A.Baıtursynov atyndaǵy Qostanaı memlekettik ýnıversıtetinde ótken «Baıtursynov oqýlary–2015» halyqaralyq ǵylymı-teorııalyq konferensııasy bul joly «Nurly Jol» damý baǵdarlamasy: bilim-ǵylym-óndiris» taqyrybyna arnaldy. Konferensııaǵa Reseıden, Túrkııadan, Qyrǵyzstannan, Qazaqstannyń oblystarynan ǵalymdar men magıstranttar qatysty. Onda A.Baıtursynov atyndaǵy Qostanaı memlekettik ýnıversıtetiniń rektory, veterınarııa ǵylymdarynyń doktory, professor Asqar Nametov «Elimizdiń ındýstrııalyq-ınnovasııalyq damýy úshin jańa formasııada mamandar daıyndaýdyń mańyzy», Reseıdiń Chelıabi memlekettik ýnıversıtetiniń oqý isi jónindegi prorektory, fılologııa ǵylymdarynyń doktory, professor Lılııa Nefedova «Shet tili salasynda paradıgmdi uıymdastyrý», Janbol Jylbaev «Qorshaǵan ortany qorǵaýdan – turaqty damýǵa jáne «jasyl ekonomıkaǵa: Qazaqstandaǵy bilim berý salasyndaǵy ekologızasııanyń halyqaralyq mazmuny» jóninde tereń baıandamalar jasady.
Halyqaralyq ǵylymı-teorııalyq konferensııaǵa qatysýshylar dóńgelek ústel májilisinde joǵary mektepte bilim berý prosesiniń mańyzdy máselelerin qozǵady. Sonymen qatar, ǵalymdar men izdenýshiler birneshe seksııaǵa bólinip, taqyryptar boıynsha ǵylymı talqylaýǵa qatysty. Bul konferensııanyń jyldaǵydan ereksheligi oǵan ǵylym kógine talpynǵan magıstranttar kóp keldi. Qazaqtyń qyzdar memlekettik pedagogıkalyq ýnıversıtetiniń magıstranttary Uldana Bısenbıeva kúrish jarmasynan spırt alýdyń tehnologııalyq úlgisin jasaýdy, Baný Dııarova kóksaǵyz ósimdigi quramyndaǵy amın qyshqyldaryn zertteýdi qolǵa alypty. Magıstratýranyń ekinshi kýrsynda oqıtyn olar ǵylymı eńbeginiń óndiriske engiziletinine, bolashaǵyna senimdi.
Názıra JÁRIMBETOVA, «Egemen Qazaqstan».
QOSTANAI.