Qazaqstan Jazýshylar odaǵynda Abaı men Muqaǵalıdyń túrik tiline aýdarylǵan jyr jınaqtary men hakimniń «Qara sózderi» kitabynyń tusaýkeseri bolyp ótti.
Asa qýanyshty qaýyshýdy Qazaqstan Jazýshylar odaǵynyń basqarma tóraǵasy, Parlament Senatynyń depýtaty Nurlan Orazalın ashty. Aldymen sóz alǵan Qazaqstannyń Túrkııadaǵy elshisi Janseıit Túımebaev muny baýyrlas túrik eliniń qazaq ádebıeti men óneri úshin jasaǵan baǵa jetpes syıyna balady. Elshilik arqyly uıymdastyrylǵan mádenı sharanyń aǵaıyn halyqtyń arasyndaǵy dostyqtyń, baýyrmaldyqtyń altyn kópiri bolatynyna sendirdi.
Túrkııada tárjimalanyp, túrik baspasynan shyqqan kitapty kózben kórip, qolmen ustaǵan qalamgerlerdiń aldy bolyp Ánes Saraı kóńil tolqynysyn bylaı jetkizdi:
– Bul bizdiń kókeıimizde kópten júrgen armanymyz edi, oryndaldy. Ertede Máskeýde orys tilinde tárjimalanyp shyǵatyn basylymdarǵa ekiniń biriniń qoly jetpegen de zaman bolǵan. Bastaýy úlken istiń alǵashqy qarlyǵashy úshin shyn júrekten qýanyp turmyz, – dedi ol.
Budan soń sóz alǵan qazaqtyń belgili aqyn-jazýshylary Orazaqyn Asqar, Marfýǵa Aıthojına, Smaǵul Elýbaı, Ahmetjan Ashırı, Jumabaı Shashtaıuly ıgilikti iske qanaǵat sezimderin bildirdi.
Halyqaralyq «Túrksoı» uıymynyń ókili Málik Otarbaevqa da alǵys aıtyldy. Kitaptyń bir ereksheligi – árbir jyr shýmaǵynyń túrikshe aýdarmasynyń qaptalyna qazaqsha túpnusqasy qosymsha berilip otyrǵan.
Qazaq poezııasynyń qos qudiretiniń shyǵarmalaryn tárjimalaǵan túrkııalyq tanymal shaıyr – Zafer Qıbar.
Talǵat SÚIINBAI,
«Egemen Qazaqstan».
ALMATY.
–––––––––––
Sýretti túsirgen avtor.