ASTANA. 14 mamyr. Ulybrıtanııanyń buqaralyq aqparat quraldary 10 jylǵa sozylǵan sot daýynan keıin patshaıym Elızaveta II-niń úlken uly Charlz hanzadanyń hattaryna qol jetkizdi. Atalǵan hattar osy eldiń úkimetine baǵyttalǵan. Bul týraly 24today.net habarlady.
Joǵarǵy sottyń sheshiminen keıin 13 mamyrda jeti túrli mınıstrlikke jiberilgen 27 hat Ulybrıtanııa úkimetiniń saıtynda jarııalandy. 2004-2005 jyldary jazylǵan bul hattar sol kezdiń ózinde baspasózde biraz aıqaı-shý týdyrǵan edi. О́ıtkeni, Ulybrıtanııa monarhy eldi tek shartty túrde basqarady. Sol sebepti patshaıym otbasynyń músheleri saıasatqa aralasý quqynan aıyrylǵan.
The Guardian basylymy aqparat bostandyǵy týraly zańǵa súıene otyryp, 2005 jyly alǵash ret atalǵan hattardyń mazmunyn ashyp kórsetýdi suraǵan bolatyn. Gazettiń mundaǵy basty maqsaty – hanzadanyń mınıstrlikterge ne jóninde jazǵanyn anyqtaý edi. Sodan bastap «bolashaq monarhtyń jeke hattary týraly jurtshylyq bilýge mindetti me?» degen suraq tóńiregindegi zań daýy 10 jylǵa sozyldy.
Mamyr aıynyń sońynda Joǵarǵy sot hattardy jarııalaýǵa kelisim berdi. Alaıda, Charlz hanzadanyń qorǵaýshylary bul sheshimge kelispeı, qarsy shaǵym túsirdi. Degenmen, bir kún buryn apellıasııalyq palata sheshimdi óz kúshinde qaldyrǵan.
Charlzdiń resmı ókilderi Ulybrıtanııa ádilet organynyń sheshimine kóńili tolmaıtyndaryn bildirgen. Olar «qupııalylyq qaǵıdasy buzyldy» degendi alǵa tartyp otyr. «Bul hattardyń jarııalanýy Charlz hanzadanyń qandaı da bir suraqtar boıynsha jeke alańdaýshylyq bildirý quqyn buzady», – dep málimdedi Klarens-haýstaǵy London rezıdensııasynda hanzada ókilderi.
Elaman Qońyr.
Derek: 24today.net.
Sýret: telegraph.co.uk.