Elimizde erekshe bilim berý qajettiligi bar balalarǵa kórsetiletin kómekti jetildirý máselesi Úkimet deńgeıinde qaraldy. Premer-mınıstr Oljas Bektenov bul baǵyttaǵy jumysty kúsheıtip, tıisti mınıstrlikke naqty tapsyrmalar júktedi, dep jazady Egemen.kz.
Úkimet otyrysynda sóz sóılegen Premer-mınıstr erekshe balalardy súıemeldeý júıesinde birqatar túıtkil bar ekenin ashyq aıtty. Onyń sózinshe, búgingi tańda psıhologııalyq-medısınalyq-pedagogıkalyq komıssııalardyń jumysy tolyq júktemeni kótere almaı otyr.
«Psıhologııalyq-medısınalyq pedagogıkalyq komıssııa muqtaj balalardy túgel keshendi tekserýden ótkizip úlgere almaı jatyr. Uzyn kezek birneshe aıǵa deıin sozylyp ketip otyr.
Arnaıy mamandar – ıaǵnı logopedter, sýrdologtar, reabılıtologtar jetispeıdi. Pedagogterde erekshe balalarmen jáne eresektermen jumys isteý daǵdysy tolyq qalyptaspaǵan.
Mysaly, muǵalimderdiń barlyǵy birdeı erekshe bilim berý qajettilikteri bar oqýshylarmen qalaı tıimdi qarym-qatynas ornatý kerektigin bile qoımaıdy. Ony azamattardyń kóptegen ótinishterinen baıqaýǵa bolady», dedi Oljas Bektenov.
Premer-mınıstr atap ótkendeı, kadr tapshylyǵy men ádistemelik daıyndyqtyń álsizdigi erekshe bilimdi qajet etetin balalarǵa sapaly qoldaý kórsetýge kedergi keltirip otyr. Osyǵan baılanysty Úkimet júıeli sharalar qabyldaýǵa nıetti.
Atap aıtqanda, Oqý-aǵartý mınıstrligine muǵalimderge arnalǵan arnaıy oqytý kýrstaryn turaqty túrde uıymdastyrý tapsyryldy. Bul kýrstar pedagogterdiń erekshe balalarmen jumys isteý daǵdylaryn jetildirýge baǵyttalmaq.
Sonymen birge 1 qyrkúıekke deıin ınklıýzıvti bilim berýdiń sapaly jańa modelin engizý mindeti qoıyldy. Jańa tásil aıasynda kadrlarmen qamtamasyz etý deńgeıin arttyrý, sondaı-aq qoldaý qyzmetterin kúsheıtý kózdelgen.
Almatydaǵy jeke ońaltý ortalyǵynda erekshe balalardy uryp-soqqan