ASTANA. 17 tamyz. «Sentr Kredıt banki» AQ Astana qalalyq fılıalynyń ǵımaratynda tonaý áreketi tirkeldi. Aldyn ala belgili bolǵan derekterge súıensek, urlanǵan aqshanyń somasy 30 myń AQSh dollaryn quraıdy. Bul týraly qalalyq ishki ister departamentiniń baspasóz qyzmeti habarlady.
Urlyq jaıynda aqparat jedel basqarý ortalyǵynyń pýltine búgin saǵat 08:47-de kelip túsken. Onda belgisiz bireýlerdiń ǵımarattyń jertóle qabatyna ventılıasııa shahtasy arqyly kirgeni týraly aıtylǵan. Ol jerde boıler ornalasqan tehnıkalyq bólme bolatyn. Sol bólmedegi seıfte tehnıkalyq qyzmetkerlerdiń biri jeke qarajatyn jınaǵan eken. Tonaýshylar dál sol qarjyny qoldy etken.
Osy iske qatysty «tonaý» baby boıynsha sotqa deıingi tergeý amaldary júrgizilýde.
«Banktiń múlikteri men qoımasyna eshqandaı zaqym kelgen joq. Sondaı-aq, olarǵa eshqandaı qaýip te tónip turǵan joq», – deıdi «Sentr Kredıt banki» quqyqtyq qamtamasyz etý qyzmeti bóliminiń bastyǵy Baqytjan Muhamedjanov.
Qazirgi kezde bank qalypty rejimde jumys isteýde.
Elaman Qońyr.
Derek: Astana qalalyq ishki ister departamentiniń baspasóz qyzmeti
Sýret: mail.ru.