Astanada blogerler Erbolat Janábilov pen Elmıra Tólegenovaǵa qatysty qylmystyq is sot jaryssózi kezeńine ótti. Memlekettik aıyptaýshy Oljas Haırýllaev sotta aıyptaý ustanymyn tanystyryp, aıyptalýshylardyń áreketterine quqyqtyq baǵa berip, jaza mólsherin usyndy, dep habarlaıdy Egemen.kz.
Prokýrordyń aıtýynsha, Erbolat Janábilov Qylmystyq kodekstiń 214-baby 2-bóligi 2-tarmaǵy (zańsyz kásipkerlik) jáne 218-baby 2-bóligi 1-tarmaǵy (qylmystyq jolmen alynǵan aqsha men múlikti zańdastyrý) boıynsha kináli dep tanylýy tıis. Osy baptardy jıyntyqta qarastyra otyryp, oǵan múlkin tárkileýmen qatar 4 jyl bas bostandyǵynan aıyrý jazasyn taǵaıyndaý suraldy.
Bloger Janábilov sotqa tartyldy
Al Elmıra Tólegenovaǵa qatysty prokýror 4 jylǵa bas bostandyǵynan aıyrý jazasyn surap, múlkin tárkileýdi usyndy. Sonymen birge Qylmystyq kodekstiń 74-baby 1-bóligine sáıkes, jazany óteýdi bir jylǵa keıinge qaldyrý múmkin dep esepteıtinin jetkizdi.
Alaıda bloger Erbolat Janábilov ózine taǵylǵan alaıaqtyq aıyptaryn joqqa shyǵardy.
Ol jubaıymen birge eshqandaı alaıaqtyq áreket jasamaǵanyn jáne múlkine qatysty barlyq qujattardy sotqa usynǵanyn aıtty.
«Biz alaıaqtyqpen aınalysqan joqpyz, eshkimdi aldaǵan emespiz. Prokýror da buny atap ótti, dálelder bar», dedi Janábilov.
Sondaı-aq ol áleýmettik jelilerde taraǵan kóp páterge ıe degen aqparatty joqqa shyǵardy.
«Bizde 40 páter bar dep jazyp jatyr. Biraq barlyq qujatty tapsyrdyq. Shyndyqqa sáıkes kelmeıdi», dedi ol.
Janábilovtyń aıtýynsha, ol jáne jubaıy Elmıra Tólegenova «qarapaıym adamdar» jáne blogerlikke deıin qurylys salasynda jumys istegen.
Ol ózine taǵylǵan aıyp boıynsha kez kelgen adam osyndaı jaǵdaıǵa tap bolýy múmkin ekenin de atap ótti.
Qazirgi tańda is boıynsha sońǵy sheshimdi sot qabyldaıdy.