QYZYLORDA. 17 tamyz. Búginnen bastap «Qaısar» QOFK» JShS-niń dırektory mindetine resmı túrde Nurjan Jalǵasbaev taǵaıyndaldy. Bul týraly egemen.kz tilshisi habarlady.
Osy kezge deıin Nurjan Jalǵasbaev «Qazaqstan sporttyq tehnologııalary» JShS-inde bas menedjer qyzmetin atqaryp, elimizdi álemdik berndterdiń sporttyq ekıpırovkalarymen jáne jabdyqtarymen qamtamasyz etip otyrdy. Sondaı-aq, ol sol qyzmetinde «Týr Almaty» dástúrli velojarys báıgesin uıymdastyrýǵa at salysty. Elimizdiń qarjy ınstıtýty salasyndaǵy tájirıbesi zor. Nurjan Jalǵasbaev ishki ásker jáne ishki ister organdarynda da qyzmet atqardy.
Nurjan Jalǵasbaev 1983 jyldyń 9 naýryzynda dúnıege kelgen. Qyzylorda qalasynyń týmasy. Zańger jáne ekonomıst mamandyqtary boıynsha joǵary bilimi bar. Otbasyn qurǵan, eki balanyń ákesi.
Komandaǵa jańa dırektordy Qyzylorda oblysy dene shynyqtyrý jáne sport basqarmasynyń basshysy Sadyq Mustafaev tanystyryp, qyzmetine tabystar tiledi. О́z kezeginde komandanyń jańa dırektory da senimdi aqtaýǵa bar kúshin salatynyn jetkizip, «Qaısar» fýtbol klýbyn jańa belesterge kóterý úshin aıanyp qalmaıtynyn aıtty.
«Maǵan senim artqan oblys basshylyǵyna alǵysym zor! Jankúıerler de sense deımin. Jalpy, Qyzylorda úshin men bóten adam emespin. Osynda óstim, alty jyldaı fýtbolmen aınalystym. Alǵashqy jattyqtyrýshym Vasılıı Sypkýn bolatyn. Keıin barsha balalar sekildi Vladımır Olshanskııdiń qaramaǵynda jattyqtym. Sizdermen birge «Qaısar» fýtbol klýbyn jańa belesterge kóterip, stadıonǵa kórermendi neǵurlym kóbirek tartamyz dep oılaımyn», - dedi Nurjan Jalǵasbaev.
Dastan Kenjalın.
Derek, sýret: «Qaısar» QOFK» JShS.