Aqmola oblysyndaǵy Selınograd aýdanynyń ortalyǵy – Aqmol aýylynda ústimizdegi jyldyń 9 mamyrynda eki márte Keńes Odaǵynyń Batyry Talǵat Bıgeldınov pen Halyq Qaharmany Raqymjan Qoshqarbaevqa arnalǵan qos bıýsttiń jáne osy aýdannan soǵysqa qatysqan jáne tylda eńbek etken azamattardyń esimderi qashalyp jazylǵan eskertkish taqtanyń ashylý saltanaty ótti.
Bul óńirden soǵysqa 2 019 bozdaq attanypty. Olar basqynshylarǵa qarsy aıanbaı kúresip, erliktiń jarqyn úlgisin kórsete bildi. Sol sııaqty, tyl eńbekkerleriniń de jeńisti jaqyndatýǵa qosqan úlesi erekshe. Búginde olardyń janqııarlyq erlikteri men eren eńbekterin umytpaı, urpaq jadynda jańǵyrtý maqsatynda kóptegen jumystar atqarylýda. Osynaý ıgi isterdiń biri retinde, Aqmol aýylynyń ortalyq alańyna osy aımaqtan shyqqan ardagerlerdiń esimderi jazylǵan eskertkish taqtanyń ashylǵanyn aıtar edik.
Taǵy bir erekshe toqtala keter jaıt, eki márte Keńes Odaǵynyń Batyry Talǵat Bıgeldınov pen Halyq Qaharmany Raqymjan Qoshqarbaev dál osy óńirde dúnıege kelip, maıdanǵa osy aımaqtan attanǵan-dy. Sondyqtan da, qos batyrdyń óz aýdandarynyń týmasy ekenin maqtan tutatyn jerlesteri olardyń eńseli músinderin Aqmol aýylynyń kórnekti jerine qoıyp, kóńilderin demdedi.
Ardaqty tulǵalarǵa arnalǵan eskertkishterdiń ashylýy rásimine Raqymjan Qoshqarbaevtyń apasy Rymjan Musabekqyzy jáne Talǵat Bıgeldınovtiń uly Talǵat Talǵatuly qatysyp, osynaý ıgi sharany uıymdastyrǵan el aǵalaryna, Selınograd aýdanynyń halqyna alǵystaryn bildirdi.
Rymjan Musabekqyzy:
– Bul kisige der kezinde ataq berilmese de, halqy batyr dep ataǵan. Qaharman ataǵyn ózi ómirden ozǵannan keıin 11 jyldan soń berdi. Endi, mine, eskertkishi qoıyldy degennen keıin arnaıy kelip turmyn. El aǵalaryna, ózderiniń batyr uldaryn qurmettegen halyqqa rahmet, – dedi.
О́z kezeginde Talǵat Bıgeldınovtiń uly Talǵat Talǵatuly da júrekjardy sózin arnap, ákesin ardaq tutqan jamaǵatqa jyly lebizin arnady.
Al oblys, aýdan basshylary batyrlardyń bul erligi búgingi elge estelik, erteńgi óskeleń urpaqqa ónege ekenin, sol sebepti de, erlerimizdi ulyqtap, eskertkish qoıǵandy jón dep sanaǵandaryn jetkizdi.
Batyrlardy qasterlegen osynaý saltanatty shara barysynda halyqqa aýdan ónerpazdary jyrdan shashý shashyp, merekelik kóńil-kúı syılady.
Dana ALDANQYZY,
Selınograd aýdandyq
ákimdiginiń baspasóz hatshysy.
Aqmola oblysy.