QYZYLORDA. 17 tamyz. Qyzylorda oblysynyń ishki ister departamenti men Aral aýdandyq ishki ister bólimi qyzmetkerleriniń birlesken jumysy nátıjesinde taǵy bir esirtki alqaby anyqtaldy. Bul týraly egemen.kz tilshisi habarlady.
Aral aýdany, Jińishkequm men Qaraqum eldimekenderiniń aralyǵyndaǵy qumdardyń arasynda esirtki alqabynda egip-baptaý jumystarymen aınalysyp jatqan 26 jáne 19 jastaǵy Baıqońyr qalasynyń eki turǵyny ustaldy. Tekserý barysynda, atalǵan azamattar jalpy salmaǵy 232 kılo 96 gramdy quraıtyn 416 túp sora ósimdigin iri mólsherde ósirgendigi anyqtaldy. Anyqtalǵan 416 túp sora ósimdiginiń 396 túbi órteý jolymen joıylsa, 20 dana túbi sot-saraptamalyq tekseriske joldandy.
Sonymen qatar, atalǵan aýmaqta ornalasqan kúrkeden 31 túp keptirilgen jasyl tústi ózine tán ıisi bar ósimdik tektes zat jáne sora ósimdiginiń tuqymy, qural-saımandar aıǵaq zat retinde alyndy.
Erjan Baıtiles.
Derek: egemen.kz.
Sýret: QazAqparat.