Prezıdent memlekettik marapat jáne áskerı shen tapsyrý rásiminde sóılegen sózinde kez kelgen qaqtyǵys dıplomatııalyq jolmen, kelissózder arqyly sheshilýge tıis ekenine toqtaldy, dep habarlaıdy Egemen.kz.
«Biz halyqaralyq quqyq qaǵıdattary men normalary qatań saqtalýy kerek dep sanaımyz. Qazaqstan álemniń barlyq elimen dostyq qarym-qatynasyn nyǵaıta beredi. Osy myzǵymas ustanymdar jańa Ata zańymyzda naqty aıqyndaldy. Biraq bul qamsyz otyrý qajet degen sóz emes. Elimiz túrli syn-qaterdiń aldyn alýǵa jáne kez kelgen qaýipke tótep berýge daıyn bolýǵa tıis. Sondyqtan memleketimizdiń qorǵanys qabiletin kúsheıtip, áskerimizdi eń birinshi kezekte tehnologııalyq turǵydan jańǵyrta berýimiz qajet. Bul – qazirgi turaqsyz, qubylmaly zamannyń talaby, sony eskere otyryp, eń aldymen, Qarýly kúshterimizdi jáne áskerı mekemelerimizdi túbegeıli reformalaý kerek. Bul – strategııalyq mańyzy zor mindet, ony sozbaı, eki jyl ishinde oryndaý qajet», dedi Qasym-Jomart Toqaev.
Qasym-Jomart Toqaev: Álem elderiniń qazaq armııasyna degen senimi joǵary
Memleket basshysy sonymen qatar elge qorǵan bolý eń abyroıly qyzmet ekenin atap ótti.
«Naǵyz patrıot azamat úshin budan asqan mártebe joq. Kúshtik qurylym qyzmetkerleriniń kúndelikti tabandy eńbegi el úshin jasalǵan erlik ekeni sózsiz. Sizder árqaısyńyz sertke berik bolyp, Otan aldyndaǵy mindetterińizdi minsiz oryndap júrsizder. Men Memleket basshysy jáne Joǵarǵy Bas Qolbasshy retinde barshańyzǵa shynaıy rızashylyǵymdy bildiremin. Búgin sizderge áskerı ataq pen synyptyq shen berý týraly tıisti Jarlyqqa qol qoıdym. Buǵan qosa birqatar azamatty joǵary memlekettik nagradamen marapattaý týraly sheshim qabyldadym. Barshańyzǵa qutty bolsyn! О́skeleń urpaq sizderge qarap boı túzeıdi, týǵan elge adal bolýdy úırenedi. Sizder jastarǵa úlgi bolyp, jol kórsetip, árdaıym ult múddesine qyzmet ete beresizder dep senemin. Aıbyndy armııamyzdyń abyroıy arta bersin», dedi Prezıdent.