Keshe «Astana EKSPO-2017» ulttyq kompanııasy men «Eır Astana» AQ ózara yntymaqtastyq jónindegi memorandým jasasty. Osy memorandým aıasynda «Eır Astana» kompanııasynyń áýe kemeleri EKSPO-2017 kórmesiniń resmı áýe tasymaldaýshysy» degen eksklıýzıvti mártebege ıe boldy.
Memorandýmǵa qol qoıý rásimine arnalǵan saltanatty otyrysty «Astana EKSPO-2017» UK basqarma tóraǵasy Ahmetjan Esimov ashyp, jınalǵandardy eki kompanııa arasyndaǵy yntymaqtastyq baılanystyń odan ári nyǵaıýymen quttyqtady. «Elbasy «Astana EKSPO-2017» kompanııasyna elimizdegi barlyq ulttyq kompanııalarmen tyǵyz baılanysta jumys isteýi týraly keshendi mindet qoıdy. Osyǵan baılanysty biz barlyq ulttyq kompanııalarmen ortaq maqsat jolynda tyǵyz yntymaqtastyq baılanysqa shyqtyq. «Eır Astana» Qazaqstandaǵy eń iri áýe tasymaldaýshysy bolyp tabylady. Búgingi memorandým – bizdiń bul kompanııamen yntymaqtastyq aıasynda jasaǵan alǵashqy sharamyz. Áýe kompanııasynyń kómegimen biz EKSPO-2017 syndy iri ulttyq jobany búkil álemde ilgeriletýge múmkindik alamyz», – dedi Ahmetjan Esimov óziniń kirispe sózinde.
«Biz «Eır Astana» ushaqtarynyń borttarynda «EKSPO-2017» logotıpin ornalastyryp, áýe kompanııasynyń basshylyǵymen halyqaralyq kórmeni nasıhattaýǵa arnalǵan birlesken josparymyzdy ázirledik. Eki kompanııa arasyndaǵy bul yntymaqtastyq Astanada ótetin EKSPO-2017 kórmesiniń halyqaralyq sahnadaǵy ımıdjine jemisti yqpal etedi. Sonymen birge, osy yntymaqtastyq aıasynda «Eır Astana» kompanııasynyń áýe kemelerimen Qazaqstanǵa kelgen tulǵalarǵa jáne áýe kompanııasynyń tranzıttik jolaýshylaryna 2017 jylǵy kórmege tegin bıletter usynylatyn bolady», – dep atap kórsetti óz sózinde «Astana EKSPO-2017» UK basqarma tóraǵasy.
О́z kezeginde «Eır Astana» kompanııasynyń prezıdenti Pıter Foster «Astana EKSPO-2017» UK-pen jasalyp otyrǵan bul yntymaqtastyq memorandýmy áýe tasymaldaýshysynyń halyqaralyq alańda bedeliniń artýyna yqpal etetindigin atap kórsetti. «Aldaǵy EKSPO-2017 kórmesiniń basty taqyryby «Bolashaqtyń energııasy» bolǵandyqtan, energetıka salasyndaǵy ınnovasııalyq sheshimderge jáne bul jobalardyń qorshaǵan ortaǵa tıgizetin áserine basty nazar aýdarylatyn bolady. Bizdiń kompanııada qorshaǵan ortany barynsha qorǵaýǵa múmkindik beretin zamanaýı tehnologııalardy engizýge baǵyttalǵan keshendi sharalar qabyldanýda. Dál osy sebepti biz jaqynda Parıjde ótken kórmede NEO tobyna jatatyn Airbus A320 ushaǵyn satyp alýǵa nıetti ekenimizdi málimdedik. Bul ushaqtardyń qozǵaltqyshy aýaǵa shyǵarylatyn zııandy zattardyń mólsherin 15 paıyzǵa deıin tómendetýge múmkindik beredi. Bizdiń kompanııamyzda NEO laınerlerin engizý 2016 jyly bastalady. Jahandyq aýqymda erekshe mańyzdy oqıǵalardyń biri retindegi EKSPO-2017 kórmesine daıyndyq qyzý qarqynmen júrgizilýde. Astanadaǵy EKSPO-2017 kórmesine keletin qonaqtarǵa «Eır Astana» áýe qaqpasynyń aıqara ashylar sátin asyǵa kútýdemiz», – dedi Pıter Foster.
Saltanatty rásimde «Astana EKSPO-2017» ulttyq kompanııasynyń basqarma tóraǵasy Ahmetjan Esimov jáne «Eır Astana» áýe kompanııasynyń prezıdenti Pıter Foster eki kompanııa arasyndaǵy yntymaqtastyq memorandýmyna qol qoıdy. Osy memorandým aıasynda expo2017astana.com veb-saıtynda avtomattandyrylǵan brondaý júıesin engizý jáne eki kompanııa birlesip PR-naýqandy ótkizý máselelerin belgileý josparlanyp otyr.
Jylqybaı JAǴYPARULY,
«Egemen Qazaqstan».