О́ńi túgil, túsine kirmegen tosyn qýanyshty jaı aldan shyǵary, ózi aǵynan jaryla aıtqandaı, sol kúni Mısochenko ájeıdiń qaperinde joq edi. Tórt balasynyń úıdegi kenjesi kenet teledıdardyń daýysyn kóterińkirep: «Mama, siz Prezıdentke hat jazyp pa edińiz. Sizdi aıtyp jatyr», degende sener-senbesin bilmeı, apyl-ǵupyl jaqyndaı túsip tyńdaǵanda, ras eken. Osynyń aldynda Qazaqstan halqy Assambleıasy Keńesi músheleriniń kezekten tys prezıdenttik saılaý ótkizý jónindegi usynysyna rızalyqpen óziniń, balalary men nemereleriniń baqytty ómirindeı barsha jurt jaqsy turmysy, birligi men tynyshtyǵy úshin eren eńbegine alǵys bildirip jazǵan haty mazmunyn Elbasy aýzynan birge estip, áp-sátte analarynyń bútkil el aldynda mereıi asýy shattyqqa bólengen úlken shańyraqqa umytylmas oqıǵa bolyp qalypty. Asyl ájelerin aımalaǵan, ájeleri qulaqtaryna quıyp otyratyndaı erteńderine alańsyz jetkinshekterdiń maqtanyshy, ásirese, bólek ekeni sezildi.
– Bárimizdi ortaq maqsat, bir tilekke uıystyrǵan Tuńǵysh Prezıdentimiz N.Á.Nazarbaevqa analyq shyn júrekten Táńir jarylqasyn aıtyp, rızashylyǵymdy bildirgim keldi. Aldaǵy jyly Jaratqan amandyǵyn berse, seksenge tolǵaly otyrmyn. Jas kezimde Qazaqstandaı qushaǵy keń, baýyrmaldyǵy ystyq elge tamyr tartýǵa jazǵan taǵdyryma táýbe etemin. Turǵylyqty halyqtyń eshkimdi jatyrqamaıtyn, meımandos, aqkóńil qasıeti múldem baýrap, osynaý ǵajaıyp elde birjola turaqtap qaldym. Osynaý úrdis úlgisi úzilmeı kele jatýyna qýanyshtymyn. Sony keremet jarastyryp, bárimizdiń tatý-tátti ómir súrýimizdi úılestirip, keleshektiń kemel bolýyna bastaǵan Nursultan Ábishuly Nazarbaevtyń eren eńbegine alǵys qashanda sheksiz. Prezıdenttik saılaýdyń ótkizilýi jónindegi halyqtyń qalaýyn qoldap, sheshim shyǵarylýy tilegimizge saı boldy. El senimi Memleket basshysyna artylatyndyǵyna, óz basym sony qalaıtynymdy taǵy bir aıtqym keledi, – dedi Nına Alekseevna buqaralyq aqparat quraldary ókilderimen kezdesýde.
Bul kisiniń esimi buǵan deıin de qaraǵandylyqtarǵa beımálim emes-tin. О́tken ǵasyrdyń 60-shy jyldary basynda qosaǵy Petr Prokopevıch Mısochenkomen qol ustasyp sonaý Belorýssııadan óndiris ekpini alysqa jańǵyrǵan jas qalaǵa kelgende ekeýi de qyz-qyz qaınaǵan qurylys jumystaryna atsalysýdy tańdaǵan bolatyn. О́mirlik serigi ǵumyrynyń aıaǵyna deıin súıikti isinen qol úzbedi. Kenshiler shaharynda sol ýaqyttarda salynǵan ásem turǵyn úıler men záýlim ǵımarattardyń kóbinde qoltańbasy qalýymen tanylǵan qurylysshy atandy. Ol qabyrǵalaryn sheberlikpen qalaýmen aınalyssa, iske shıraq Nına ishin áspetteýde aldyna jan salmady. Búginde Núrken Ábdirov, Buqar jyraý, Beıbitshilik dańǵyly sııaqty qalanyń eń kórikti kóshelerin nemerelerine kórsetip, bulardy biz saldyq dep marqaıyp qoıatyny da sondyqtan.
Shúkir, otbasyndaǵy ónegeli tárbıeniń, adal eńbekke baýlýdyń arqasynda balalarynyń bári ómirden óz joldaryn tapty. Árqaısysy jeke-jeke otaý ıesi, ortalaryna syıly azamattar qazir. Olardan taraǵan 7 nemere men 8 shóberesiniń, qany belorýstyq, júregi qazaqstandyq Mısochenkolar áýletiniń qazaq jerinde túpkilikti tamyrlanýyna qýanady Nına Alekseevna.
Seksen degen jasyna qarap ony jan kúıttegen jan dep oılap qalýǵa bolmaıdy. Oblystyq belorýs «Spadchyna» etnomádenı birlestiginiń belsendi múshesi retinde qoǵamdyq is-sharalardyń bel ortasynda júrýimen de tanymal. Qansha aıtqanmen, jaqsylyqty kóńilge toqyǵan adam ǵoı, yntymaqtastyqqa, birlikke úndegen aqyl-keńesteri altyndaı baǵalanady. Áli de saqtalǵan ádemi daýysymen ulttyq ánderdi shyrqaǵanda qandastarynyń jan-dúnıesin jadyratady. Ana tilin úırenýshiler úıiriledi janyna.
Dostyq osyndaı oıly, kókiregi taza, arly adamdar arqyly dánekerleser emes pe! «Dos tutqandy qadirle» deıdi halyq. Mundaı qurmetke laıyq osy bir qarapaıym keıýananyń shynaıy azamattyq sezimi, otanshyldyq pák nıeti tánti qylady bárin. Ár etnostyń salt-dástúrin saqtaýǵa, mádenıetin órkendetýge barlyq jaǵdaıdy jasap otyrǵan, halqynyń júregine jol taba bilgen Elbasyna degen rızashylyqtary sheksiz.
Aıqyn NESIPBAI,
«Egemen Qazaqstan».
QARAǴANDY.