Mektep partasyndaǵy bala erteń qandaı mamandyq ıesi bolady? Buǵan keıde toqsandyq baǵa men emtıhan nátıjesinen buryn, onyń belgili bir salaǵa degen turaqty qyzyǵýshylyǵy jaýap beredi. Ásirese jaratylystaný, tehnıka jáne aqparattyq tehnologııalar baǵytyna erte beıimdelgen oqýshynyń bolashaq kásibi de sol izdenisten bastaý alyp jatady. Biri ǵaryshqa qyzyǵyp teleskop qurastyrsa, endi biri dron tehnologııasyn meńgerýge talpynady. Astanadaǵy Oqýshylar saraıynda ótken «Altyn Orda» mektebi oqýshylarynyń jobalar festıvali osyndaı izdenistiń naqty kórinisin kórsetti.
Mundaǵy basty maqsat – balanyń alǵan bilimin ómirmen ushtastyryp, oıyn tájirıbe arqyly dáleldeýge baýlý. Iаǵnı, oqýshy daıyn aqparatty jattap qana qoımaı, ózi zerttep, baıqap, suraq qoıyp, oǵan jaýap izdeýge talpynady. Sondyqtan bul alańda balalar qyzyǵýshylyǵyn naqty jobaǵa aınaldyryp, eńbegin kópshilik aldynda tanystyrdy. Biri shaǵyn raketa qurastyryp, ushyrý mehanızmin zerttese, endi biri Galıleı teleskopynyń jumys isteý qaǵıdatyn tájirıbe arqyly kórsetýge tyrysqan. Bolashaq ǵarysh kemesiniń 3D úlgileri, dron tehnologııalary men IT baǵytyndaǵy jobalar da kópshilik nazaryna usynyldy.
Fızıka pániniń muǵalimi Aspandııar Tileýqabaqovtyń aıtýynsha, festıvalde usynylǵan jobalardyń birqatary buǵan deıin qalalyq jáne respýblıkalyq baıqaýlarda júlde alǵan.
«Oqýshylarymyz fızıka, astronomııa, ǵarysh taqyrybynda ǵylymı jobalar ázirledi. Raketa ushyrý, Galıleı teleskopyn jasaý, bolashaq ǵarysh kemesin 3D modeldeý baǵytyndaǵy jumystar balalardyń ǵylymǵa qyzyǵýshylyǵyn arttyrady. Mundaı izdenis olardyń shyǵarmashylyq pen zertteý qabiletin damytady», deıdi muǵalim.
Mektep dırektory Názıla Turmahambettiń aıtýynsha, «Altyn Orda» mektebinde oqýshylardyń shet tilderin meńgerýine, sıfrlyq saýattylyǵyn arttyrýǵa, zertteý qabiletin damytýǵa basymdyq beriledi. Bastaýysh synyptarda «Sıngapýr matematıkasy» ádistemesi qoldanylyp, balalardy esepti jattap emes, logıkalyq ári júıeli oılaý arqyly shyǵarýǵa úıretedi. Sonymen qatar mektepte zamanaýı tehnologııalar keńinen paıdalanylyp, negizgi pánder tereńdetilip oqytylady. Oqýshylarǵa túrli úıirmeler men sport seksııalary da jumys isteıdi.
«Biz úshin mektep tek bilim beretin oryn ǵana emes, jańa ıdeıalar men jobalar týyndaıtyn orta. Eń mańyzdysy, ár bala ózin qoldaýly, nazardaǵy tulǵa retinde sezinýi kerek», deıdi mektep dırektory.
Festıvalde oqýshylar qonaqtardyń suraǵyna jaýap berip, ıdeıasynyń mánin túsindirýge tyrysty. 10-synyp oqýshysy Álibek О́nerbaı bıyl osy mektepke aýysqan. Onyń aıtýynsha, «Altyn Orda» mektebin tańdaýǵa IT baǵyty men ustazdar, oqýshylar arasyndaǵy ashyq qarym-qatynas áser etken. Álibek dron tehnologııalaryna qyzyǵady. Ol Ortalyq Azııa deńgeıindegi dron sımýlıator jarysynda alǵashqy ondyqqa kirgenin, sondaı-aq birneshe shaǵyn jarysta júldeli oryn alǵanyn aıtty. Oqýshynyń sózinshe, dron fýtboly komandalyq oıynǵa uqsaıdy: bes adamnan quralǵan top drondardy basqaryp, belgilengen tapsyrmalardy oryndaıdy. Mundaı joba baladan tehnıkalyq mashyqpen birge jyldam sheshim qabyldaý, dáldik, komandalyq úılesim talap etedi.
JI dáýirindegi mektep: Oqýshylarǵa paıdasy men qaýpi qandaı?
Ata-analar úshin de festıval mekteptiń ishki ómirin jaqynyraq tanýǵa múmkindik berdi. Birinshi synyp oqýshysynyń anasy Gúlnur Dosqalıeva «Altyn Orda» mektebi týraly alǵash Instagram arqyly bilgenin, keıin mektepke arnaıy ekskýrsııaǵa kelip, balasyn osy bilim ordasyna berýge sheshim qabyldaǵanyn aıtty.
«Qyzymnyń qaı salaǵa beıim ekenin áli naqty aıta almaımyn, biraq matematıkaǵa ıkemi bar sııaqty. Meni mekteptiń IT baǵyty qyzyqtyrdy. Qazir bolashaq sıfrlyq tehnologııalarmen tyǵyz baılanysty ekeni anyq. Munda matematıkaǵa da aıryqsha kóńil bólinedi. Osyndaı is-sharalar balalardyń qarym-qatynas jasaý qabiletin, ózine senimin, ózin erkin ustaýyn qalyptastyrady», deıdi ata-ana.
Aıta keteıik, «Altyn Orda» mektebi ashylǵanyna eki jyl ǵana bolǵanymen, bilim berý sapasy men oqýshylar jetistigi arqyly kózge túse bastaǵan. Oqý jyly ishinde 94 oqýshy qalalyq olımpıadalardyń, 37 oqýshy oblystyq kezeńderdiń, 12 oqýshy respýblıkalyq deńgeıdegi baıqaýlardyń júldegeri atandy. Sondaı-aq 5 oqýshy halyqaralyq konkýrstar men ǵylymı jobalarǵa qatysty. Mektep komandasy 22-26 sáýir aralyǵynda Túrkııanyń Antalııa qalasynda ótken Fibonacci International Robot Olympiad-2026 halyqaralyq robototehnıka olımpıadasyna da qatysqan.
Mektepterde oqýshylarǵa smartfon qoldanýǵa tyıym salynýy múmkin
Jobalar festıvali oqýshy eńbegin kópshilikke kórsetý ǵana emes, balanyń boıyndaǵy izdenis pen senimdi kúsheıtetin orta ekenin ańǵartty. Ǵylymǵa qyzyqqan jas úshin alǵashqy model, alǵashqy tájirıbe, alǵashqy kópshilik aldyndaǵy tanystyrylym úlken joldyń basy bolýy múmkin.