«Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıým aıasynda qatysýshylar Altyn Ordanyń tarıhı murasynyń mádenı jadyny qalyptastyrýdaǵy, tarıhı sanany nyǵaıtýdaǵy jáne Ortalyq Eýrazııa elderindegi gýmanıtarlyq ǵylymdy damytýdaǵy mańyzyn talqylady, dep habarlaıdy Egemen.kz
«Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıým aıasynda qatysýshylar Altyn Ordanyń tarıhı murasynyń mádenı jadyny qalyptastyrýdaǵy, tarıhı sanany nyǵaıtýdaǵy jáne Ortalyq Eýrazııa elderindegi gýmanıtarlyq ǵylymdy damytýdaǵy mańyzyn talqylady.
Memleket basshysy: Altyn Orda tarıhy kóptegen irgeli zertteýlerge arqaý boldy
Plenarlyq otyrysta О́zbekstan Ǵylym akademııasynyń prezıdenti Shavkat Aıýpov sımpozıým taqyrybynyń tarıhı ǵylym úshin ǵana emes, óńir halyqtarynyń ortaq ótkenin zerdeleý turǵysynan da aıryqsha mánge ıe ekenin atap ótti.
«Altyn Orda – ortaǵasyrlyq dáýirdegi jaı ǵana memleket emes. Bul – dala men qalalardy, kerýen joldary men qolóner ortalyqtaryn toǵystyrǵan keń tarıhı keńistik. Munda kóshpeli jáne otyryqshy órkenıetter ózara yqpaldasyp, ǵasyrlar boıy Ortalyq Eýrazııanyń saıası, mádenı jáne etnıkalyq kelbetin qalyptastyrdy», – dedi ol.
Shavkat Aıýpovtyń aıtýynsha, Qazaqstan men О́zbekstan halyqtary úshin Altyn Orda tarıhy ortaq tarıhı taǵdyrmen sabaqtas. Ol Deshti Qypshaq keńistiginde dala jáne oazıstik aımaqtardyń ózara yqpaldastyǵy nátıjesinde saıası dástúrler, sharýashylyq júıeleri, tildik jáne mádenı ortaqtyq qalyptasqanyn atap ótti. Bul úderister óńir halyqtarynyń tarıhı bolmysynyń negizin qalady.
Baıandamada Altyn Orda murasyn zertteýde ǵylymı obektıvtilikti saqtaý qajettigine erekshe nazar aýdaryldy. Tarıh Eýrazııa halyqtaryna ortaq qundylyq retinde qarastyrylyp, ózara túsinistik pen mádenı dıalogty damytýǵa, óńirlik yntymaqtastyqty nyǵaıtýǵa qyzmet etýi tıis ekeni aıtyldy.
Talqylaý barysynda Altyn Orda dáýiriniń tarıhı tájirıbesin zerdeleý Ortalyq Eýrazııa halyqtarynyń ózara baılanysyn tereńirek túsinýge múmkindik beretini jáne birlesken ǵylymı zertteýler men akademııalyq yntymaqtastyqty damytýǵa jol ashatyny atap ótildi.