Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Qurban aıt merekesindegi amaldar týraly aıtty, dep jazady Egemen.kz.
«Shyn máninde, Qurban aıt – jalań qurbandyq emes, ol – ishki jan-dúnıeńdi tazartý men rýhanı turǵydan jańǵyrý degen sóz. Sultanmahmut Toraıǵyrov babamyz bir sózinde din shyn aqyl, ǵylymmen birlik etse ǵana shyn din bolatynyn, qur kóńilge senip, qulshylyq etý durys emes ekenin aıtqan. Rasynda «qurban» sózi «jaqyn bolý», «jaqyndaý» degen uǵymdy bildiredi. Bul – shynaıy nıet pen Allaǵa degen súıispenshilikti pash etetin meıram. Ulyq merekeniń tárbıelik máni men maǵynasy osynda jatyr» deıdi Bas múftı.
Naýryzbaı qajy Taǵanuly óz sózinde, materıaldyq múmkindigi bar əri jolaýshy emes musylmanǵa qurbandyq shalý – ýəjip, musylmandyq mindet ekenin aıtady. Sondaı-aq shamasy kelmegen adamǵa Alla Taǵala mundaı mindet júktemegenin aıt kúnderi az da bolsa sadaqa berip, qaraýsyz qalǵan qarttarǵa, jetimder men kópbalaly otbasylarǵa kóńil bólý – saýapty is ekenin jetkizdi.
«Qurban aıt tek qurban shalýmen shektelmeıdi. Bul – aǵaıyn arasyn jaqyndata túsetin kún. Arazdasqan adamdar tatýlasyp, ózara keshirim jolyn ustanady. Aıt kúnderi týysqannyń basyn qosyp, qarym-qatynasty kúsheıtken abzal. Qurban aıt – otbasy qundylyǵyn arttyratyn mereke. Ata-anamyzǵa, bala-shaǵamyzǵa syılyq berip, olarǵa arnaıy kóńil bólip, barynsha qýantaıyq» dedi Naýryzbaı qajy Taǵanuly.
Sondaı-aq osy amaldan keıin óskeleń urpaq Qurban aıttyń qadiri men saýabyn sezinip, izgilikke umtylyp, merekeni asyǵa kútetinin aıtty.
«Qoja Ahmet Iаsaýı babamyz bir danalyq sózinde Haqqa qyzmet halyqqa qyzmet etýden bastalatynyn aıtqan. Bul – halyqtyń razylyǵy – Haqtyń razylyǵynda degen sóz. Osy rette elimizdegi barsha sharýa qojalyqtarynyń qojaıyndaryn mal qunyn qoldan kótermeı, halyqqa ońtaıly baǵany usynýǵa shaqyramyn» dedi Bas múftı.
Aıta keteıik, Memleket basshysy el turǵyndaryn Qurban aıt merekesimen quttyqtady.