Astanada 21–27 mamyr aralyǵynda ótken Túrik ashanasy aptalyǵy aıasynda qazaq jáne túrik halqynyń kóne túrki tarıhynan tamyr tartqan ortaq taǵamdary ázirlenip, kópshilikke tanystyryldy, dep habarlaıdy Egemen.kz
Túrki dúnıesin biriktiretin gastronomııalyq murany jańǵyrtý, tanystyrý jáne nasıhattaý maqsatyn tutqan Túrik ashanasy aptalyǵy álem boıynsha bıyl besinshi ret uıymdastyrylyp otyr. Jyl saıynǵy sharanyń negizin qalaýshy – Túrkııa Prezıdenti Rejep Taııp Erdoǵannyń jubaıy Emıne Erdoǵan.
Bıyl aptalyq «Dastarhan basyndaǵy mura» taqyrybymen ótti. Ádette, jaıylǵan dastarhan ústine túrli halyqtardyń taǵamdary usynylýy múmkin. Alaıda, olardyń ǵasyrlar boıǵy tarıhtan syr shertetine mán bermeımiz. Demek, «dastarhan» – túrli ulttardy, mádenıetterdi, tarıhty ózara toǵystyratyn alań.
Qazaqstandaǵy Túrkııa Elshiligi usynǵan málimetke sáıkes, Astanaǵa shaqyrylǵan shef-aspazdar meıramhanalardyń birinde qazaq jáne túrik halyqtaryna ortaq taǵamdardy daıarlap, jas aspazdarmen tájirıbe bólisti, jınalǵan qaýymǵa olardyń shyǵý tarıhyn baıandap berdi.
Ázirlengen astyń biri – mánti. Taǵamdardyń shyǵý tarıhyn 25 jyldan astam zerttep kele jatqan shef-aspaz ári kóptegen shákirttiń ustazy – Alı Ronaıdyń aıtýynsha, mánti – kóshpendilerdiń asy ári gastronomııanyń tamasha úlgisi. «Sebebi bul taǵam Orta Azııadan bastaý alyp, Anadolyǵa jetken, keıin Eýropaǵa taraǵan. Onyń damplıng degen ataýy bar, Ázerbaıjanda – dushpara, bizge mánti bolyp keledi. Al Eýropaǵa barǵanda ravıolı, tortellını bolady. Taǵam mádenıetpen birge qozǵalyp, ataýy ózgere bergen. Mánti – eskiden kele jatqan kóshpendiler asy. Ol qunarly áli toıymdy», - deıdi.
«Qaldyqsyz as ázirleý» qaǵıdatyn qatań ustanatyn shef-aspaz Gókhan Chylak pen Alı Ronaı mántiden bólek, tuzdyǵy qymyzdan daıyndalǵan tushpara da usyndy. Budan bólek, dastarhanǵa japyraqqa oralǵan sarma, ishlı kófte jáne túrli salmasy bar qamyr taǵamdary qoıyldy. Negizgi taǵam retinde IýNESKO tizimine engen – keshkek tartý etildi (qozy eti bıdaı jáne ózge jarmalarmen birge uzaq ýaqyt baıaý otta daıyndalady).
Al «táttiler» bóliminde qaımaqtan jasalǵan balmuzdaq tys, túriktiń dástúrli desertteri men qazaqtyń ulttyq taǵamdary jent pen qospa bir dastarhan basynda úndestirildi.
1890 jyldan beri atadan mıras bolyp qalǵan naýbaıshylyq dástúrdi jalǵastyryp kele jatqan Hakan Doǵannyń aıtyp ótkendeı, nan pisirýdiń myńdaǵan máziri arasynan aptalyq úshin birnesheýin ǵana tańdap alý qıynǵa soqqan. Naýbaıshy juqa nan, bazlama, shaǵyn pıde jáne tabıǵı ashytqymen nan pisirip, ony qorytylǵan maımen jáne túrli shópterden daıyndalǵan maımen usyndy.
Aıta keteıik, shef-aspaz Alı Ronaı Anadoly men Uly dala arasyndaǵy ǵasyrlar boıy qalyptasqan ortaq ómir salty men dastarhan mádenıeti jóninde Jibek Joly telearnasyndaǵy «Demdi.life» baǵdarlamasynda keńinen áńgimelep berdi.