ASTANA. 14 mamyr. Aýǵanstan astanasy – Kabýlde bolǵan lańkestik oqıǵa saldarynan qaza tapqandar arasynda Qazaqstan azamaty da bar. Bul týraly Syrtqy ister mınıstrliginiń baspasóz qyzmeti habarlady.
Habarlamada: «Osy jyldyń 13 mamyrynda lańkesterdiń Kabýldegi Park Palace Hotel qonaq úıine jasaǵan qarýly shabýyly saldarynan sol keshenge toqtaǵan Qazaqstan azamaty, 1987 jyly týǵan Áıgerim Abdýllaevanyń qaza tapqanyn rastaımyz. Soǵan baılanysty marqumnyń týǵan-týystary men jaqyndaryna qaıǵyryp kóńil aıtamyz», – delingen.
Qazaqstannyń Kabýldegi elshiligi bolǵan jaıtqa baılanysty qajetti konsýldyq-quqyqtyq áreketterdi qolǵa aldy. Sondaı-aq, marqumnyń denesin Otanyna jetkizý úshin kómek kórsetýge daıyn ekenin habarlady.
Aıta keteıik, qaıǵyly jaǵdaı keshe keshkisin bolǵan. Atalǵan qonaq úıde turatyn sheteldikter úshin jergilikti ýaqyt boıynsha saǵat 18:00-de konsert uıymdastyrylady. Sol kezde qarýlanǵan lańkester keshenge basyp kirip, sharaǵa qatysýshylarǵa shabýyl jasaǵan. Polıseıler kelgenshe lańkester qonaq úı kúzetiniń qyzmetkerlerin óltirip, shetel azamattaryn kepildikke alyp úlgergen. Nátıjesinde tártip saqshylary birden ishke enip kete almady. 7 saǵatqa sozylǵan urys kezinde barlyq lańkestiń kózi joıyldy.
Qarýly shabýyl saldarynan Qazaqstannan bólek, AQSh, Italııa, Ulybrıtanııa jáne Úndistan azamattary da qurban boldy.
Elaman Qońyr.
Derek, sýret: Syrtqy ister mınıstrliginiń baspasóz qyzmeti.