Túrkistan oblysynyń Jetisaı aýdanyndaǵy sharýalar bıylǵy alǵashqy qarbyz ónimin jınaýǵa kiristi, dep habarlaıdy Egemen.kz.
Jyl basynan beri Túrkistan oblysynyń aýyl sharýashylyǵy qajettilikterine 1 mıllıard tekshe metrden astam sý berildi. Onyń 307 mıllıon tekshe metri Jetisaı aýdanyna tıesili.
Sýmen tolyq qamtamasyz etilgendikten, bıyl ónim de molynan shyqqan. «Baharam» sharýa qojalyǵy egistik alqaptaryn K-30 kanaly arqyly keletin sýmen qamtamasyz etip otyr.
«Bıyl 10 gektar jerge qarbyz ektik. Qazir alǵashqy ónimdi jınaý jumystary qarqyndy júrip jatyr. Sý máselesi bolǵan joq. Bul úshin Sý resýrstary jáne ırrıgasııa mınıstrligine rızashylyǵymyzdy bildiremiz», dedi sharýa qojalyqtyń tóraǵasy Shakırboı Radjapov.Aýdan boıynsha baqsha daqyldaryn sýarýǵa 53,8 mıllıon tekshe metr sý jiberilgen. Qazirgi ýaqytta Jetisaı aýdanynda baqsha ónimderin, kókónis pen jońyshqa alqaptaryn sýarý jumystary jalǵasyp jatyr.
Aıta keteıik, mamyrdyń ekinshi on kúndiginde jetisaılyq sharýalar bıylǵy alǵashqy qaýyn ónimin jınaı bastaǵan edi.