Joǵary Eýrazııalyq ekonomıkalyq keńestiń keńeıtilgen quramdaǵy kezekti otyrysynda Memleket basshysy atap ótkendeı, Eýrazııanyń kólik júıesi Azııa, Eýropa jáne Taıaý Shyǵystyń basty naryqtaryn baılanystyratyn joǵary tehnologııalyq halyqaralyq baǵyttardan quralady, dep habarlaıdy Egemen.kz Aqordanyń baspasóz qyzmetine silteme jasap.
Prezıdenttiń aıtýynsha, bul arada jalpy uzyndyǵy 50 myń shaqyrymnan asatyn kólik dálizderiniń tutas júıesi týraly sóz bolyp otyr. Onyń 10 myń shaqyrymnan astamy Qazaqstan aýmaǵy arqyly ótedi.
«Jahandyq saýda-ekonomıka tizbegindegi jetekshi ornymyzdy saqtaý úshin transshekaralyq ınfraqurylymdy odan ári damytý jáne sıfrlandyrý qajet. Yńǵaıly logıstıkalyq sheshimder, júkti turaqty jetkizý men ótkizý jyldamdyǵy Eýrazııalyq ekonomıkalyq odaqtaǵy tranzıt kólemin ulǵaıtýǵa múmkindik beredi. Sondyqtan ótken jyldyń sońynda biz Smart Cargo sekildi quraldardy júıeli túrde engize bastadyq», dedi Prezıdent.
29 mamyr – Eýrazııalyq ekonomıkalyq odaq kúni bolyp resmı túrde jarııalandy
Memleket basshysy atap ótkendeı, «Bir tereze» qaǵıdatymen qyzmet etetin platforma aıasynda kólik dálizderin sıfrlandyrý jumystary qolǵa alyndy.
«Qazaqstanda kórshi eldermen ruqsatnamany elektrondyq blanki formatynda almasý mehanızmi engizildi. Odaq aıasyndaǵy aqparattyq júıelerdi ózara kiriktirý – ýaqyt talaby. Osy oraıda Eýrazııalyq ekonomıkalyq komıssııa ulttyq servısterdiń sıfrlyq «sóresin» jasaqtaýdy qolǵa aldy. Bul – óte ózekti. Atalǵan úderisti jedeldetip, EAEO sıfrlyq kólik dálizderiniń tolyqqandy ekojúıesin qalyptastyrý qajet dep oılaımyn. Osy baǵytta kúsh-jigerimizdi biriktirsek, Eýrazııanyń joǵary tehnologııaly kólik habyn qurýǵa ábden bolady», dedi Qasym-Jomart Toqaev.
Prezıdent: Qazaqstan tehnologııany netto-eksporttaýshy mártebesin dáleldedi