Astanadaǵy Ortalyq kommýnıkasııalar qyzmetinde Qazaqstan Respýblıkasy Prezıdentiniń janyndaǵy Áıelder isteri otbasylyq-demografııalyq saıasat jónindegi ulttyq komıssııa músheleri men ortalyq jáne jergilikti atqarýshy organdary basshylarynyń «Balalardyń jazǵy demalysyn jáne saýyqtyrýdy uıymdastyrý jáne olarmen jaǵdaıy tómen otbasylardan shyqqan balalardy qamtý» men jyl saıyn ótkiziletin «Mektepke jol» aksııasy sheńberinde balalardyń mektepke daıyndyǵy máselesi boıynsha brıfıng ótti.
Ulttyq komıssııa tóraıymynyń orynbasary, Ortalyq saılaý komıssııasynyń múshesi Lázzat Súleımen baspasóz ókilderine otbasylardyń jáne balalardyń quqyqtary men múddelerin qorǵaý salasy boıynsha memlekettik saıasattyń negizgi artyqshylyqtaryn iske asyrý boıynsha qolǵa alynǵan Ulttyq komıssııanyń qyzmetimen tanystyrdy.
«Búgingi kúni qoǵamda kámeletke tolmaǵandarǵa qatygezdik jáne zorlyq-zombylyq kórsetý men beıádep minez-qulyqtardyń artýymen týyndaǵan otbasy ınstıtýtynyń problemalaryn talqylaý kúsheıgen ýaqytta, ásirese, jazǵy demalys ýaqytynda balalar men jasóspirimderdiń bos ýaqytyn oqýmen jáne uıymdarmen qamtý máselesi ózekti bolyp tabylady. Sondyqtan, jazǵy saýyqtyrý kezeńine daıyndaý jáne «Mektepke jol» atty jalpy respýblıkalyq qaıyrymdylyq aksııalaryn ótkizý aldyn ala josparlanǵan jáne turaqty qadaǵalanýda», dep atap ótti ol.
Basqosýda Bilim jáne ǵylym vıse-mınıstri Esenǵazy Imanǵalıev jazǵy demalys kezeńinde atqarylǵan sharalarǵa toqtalyp ótti. Onyń aıtýy boıynsha, búgingi tańda respýblıkada 11 092 saýyqtyrý lagerleri jáne alańdary jumys istep, jazǵy kanıkýl ishinde onda 1,5 mln.-ǵa jýyq oqýshy demalypty. Balalardyń jumyspen qamtylýyn uıymdastyrý úshin 300-ge jýyq eńbek jáne demalys lagerleri, 600-ge jýyq mektep ormanshylyqtary, 2 myńnan astam merzimdik eńbek jasaqtary, myńnan astam til mektepteri men debat lagerleri, 10 myń úıirmeler men klýbtar jumys istedi. «Mektepke jol» aksııasynyń on kúninde 16 myńnan astam balaǵa jalpy somasy 122 mln. teńgeni quraıtyn kómek kórsetildi. Memlekettik bıýdjet esebinen bıyl mektep jasyndaǵy balalardy saýyqtyrý sharalaryna 3 mlrd. 115 mln. teńge bólinipti. 700 myńǵa jýyq joǵary synyp oqýshylary jazǵy eńbekke baýlý brıgadalaryna tartyldy. Bıylǵy jazda 1 mln. 106 myń 453 bala túrli salalarǵa baýlynyp, demalys sharalarymen qamtyldy. Onyń ishinde 693 myń oqýshy 2 241 eńbek otrıadynda, 306 eńbek jáne demalys lagerlerinde, 11 447 kógaldandyrý brıgadalarynda, 564 mektep janyndaǵy ormanshylyqtarda, sondaı-aq, 4 884 jóndeý-qurylys brıgadalarynda boldy. Sondaı-aq, balalardy shyǵarmashylyq turǵyda shyńdaýǵa 10 343 klýb pen 807 aýla klýbtary atsalysyp, sporttyq-týrıstik baǵytta 241 852 bala qamtylǵany atap aıtyldy. Jaz kezinde 2 303 saparlar men ekskýrsııalar, respýblıka boıynsha 1 912 týrıstik saparlar men 443 sporttyq jıyndar uıymdastyryldy. 78 myńnan astam bala jazǵy olımpıadalyq rezervtiń 224 mektebine, «Jas Ulan» lıderleriniń 848 jazǵy mektepterine, 449 jazǵy tildik lagerler men 222 pikirsaıys lagerlerine tartyldy. Jalpy, jazǵy saýyqtyrý sharalaryna jergilikti atqarýshy organdar tarapynan 3 mlrd. teńgeden astam qarjy bólinipti.
Berik SADYR,
«Egemen Qazaqstan».