Halyqaralyq balalardy qorǵaý kúnine oraı Qazaqstannyń Bala quqyqtaryn qorǵaý jónindegi ýákili Dınara Zákıeva áleýmettik jelide jazba jarııalap, bala – eń joǵary qundylyq ekenin, balalarǵa qamqorlyq jasaý – memlekettiń basty basymdyǵy ekenin atap ótti, dep habarlaıdy Egemen.kz.
«Memleket basshysy Qasym-Jomart Kemeluly Toqaev bala qorǵaý jáne qoldaý máselelerine árdaıym erekshe kóńil bóledi. Ár balanyń ómiri mańyzdy, onyń quqyqtary, ál-aýqaty, qaýipsizdigi memleket qorǵaýynda. Osy maqsatta elimizde barlyq qajet zań qabyldanyp, arnaıy qyzmetter quryldy jáne áli de qurylyp jatyr. Árqaısyńyz balalar qorǵaýshysy bola alasyzdar. Eń bastysy – ózińizge nemese basqa balaǵa kómek qajet bolǵan jaǵdaıda bul týraly aıtýǵa jáne habarlaýǵa qoryqpańyzdar», dedi D. Zákıeva.
Konstıtýsııalyq Sot: Balalardyń zańdy múddelerin qorǵaý – basym baǵyt
Bala quqyqtaryn qorǵaý jónindegi ýákildiń eske salýynsha, búginde Qazaqstanda bala quqyqtary zańnamalyq jáne ınstıtýsıonaldyq deńgeılerde bekitilgen. Prezıdent Qasym-Jomart Kemeluly Toqaevtyń tapsyrmasymen, keıingi birneshe jylda balalardy qorǵaý júıesi men ınfraqurylymyn qalyptastyrýǵa baǵyttalǵan mańyzdy reformalar júrgizilip, zańdar men baǵdarlamalar qabyldandy. D. Zákıevanyń aıtýynsha, qoldanystaǵy barlyq mehanızmder men aldaǵy jyldarǵa arnalǵan is-qımyl jospary, jumysty jetildirý, jańa tásilderdi engizý, qyzmetkerlerdi oqytý, jalaqy arttyrý, sondaı-aq qaýipsizdik, áleýmettik qorǵaý, densaýlyq saqtaý jáne bilim berý salalaryndaǵy ózekti mindetterdi sheshý máseleleri jyl basynda qabyldanǵan «Qazaqstan balalary» ulttyq strategııasy men baǵdarlamasynda kórinis tapty.
«Balalardy qorǵaý salasyndaǵy eń mańyzdy oqıǵalardyń biri – 2024 jyldan beri júrgizilgen jumys nátıjesinde ár óńirlik ákimdikter qurylymynda Balalardyń quqyqtaryn qorǵaý basqarmalarynyń qurylýy. Olardyń qurylýy men qyzmetteri «Bala quqyqtary týraly» zańda bekitildi, barlyq qajet rásimder ótip, qaýlylar qabyldandy, qurylym men shtat qalyptastyrylyp jatyr. Bul – balalardy qorǵaý salasy úshin úlken jetistik. Buǵan deıin jergilikti atqarýshy organdar júıesinde balalardyń quqyqtaryn qorǵaýmen aınalysatyn jeke qurylym bolǵan joq. Osyǵan baılanysty biz sizderdi óńirlik Balalardyń quqyqtaryn qorǵaý basqarmalarymen tanystyryp, paıdaly aqparatpen bóliskimiz keledi», dep túıindedi Bala quqyqtaryn qorǵaý jónindegi ýákili Dınara Zákıeva.
Aıda Balaeva: Bala qaýipsizdigi – memlekettik saıasattyń negizgi basymdyqtarynyń biri