ASTANA. 18 tamyz. Elbasy Joǵarǵy Sot tóraǵasy Qaırat Mámıdi qabyldady. Kezdesýde sot júıesin «100 naqty qadam – barshaǵa arnalǵan zamanaýı memleket» ult jospary aıasynda reformalaý sharalary jáne respýblıka sottarynyń 2015 jyldyń birinshi jartysyndaǵy jumys qorytyndylary talqylandy. Bul týraly akorda.kz habarlady.
Qazaqstan Prezıdenti osy saladaǵy jańa kodeksterdiń qoldanyla bastaýyn jáne bas bostandyǵynan aıyrýdy memleketke kelgen zııannyń ornyn toltyrýmen almastyratyn qamaýǵa alýǵa balama sharalar men jazalardy meılinshe keńinen qoldanýdy qosa qamtıtyn reformalardyń oń yqpalyn atap ótti. Memleket basshysy barlyq quqyq buzýshylyqtardy tirkeý aýyr qylmystardyń sanyn azaıtýǵa septigin tıgizgenine nazar aýdardy.
Joǵarǵy sot tóraǵasy respýblıkada sot tóreligin júzege asyrýdyń ótken jartyjyldyqtaǵy qorytyndylary sapa kórsetkishiniń turaqtylyǵy men isti qaraý merziminiń saqtalyp otyrǵanyn kórsetetinin aıtty. Respýblıkada shyǵarylǵan barlyq sot aktileriniń 98,6 paıyzy zańdy ári negizdi dep tanylǵan. Elde sottalǵandardyń sany aıtarlyqtaı qysqaryp, al jasalǵan ekonomıkalyq qylmystar úshin memleketke qaıtarylǵan qarajattyń jalpy kólemi bıyl shamamen 950 mıllıon teńgeni quraǵan.
Q.Mámı Joǵarǵy Sot reformany júzege asyrý, sonyń ishinde úsh býyndy sot júıesine kóshý turǵysynan ret-retimen júrgiziletin sharalardy atqarǵanyn aıtty. Sonymen qatar, sýdıalyqqa kandıdattarǵa arnalǵan jańa biliktilik talaptaryn engizý, Joǵarǵy Sotta ınvestısııa jónindegi mamandandyrylǵan alqa qurý jáne Halyqaralyq konsýltatıvtik keńes qurý máseleleri de qarastyrylǵan.
Memleket basshysy kezdesý qorytyndysy boıynsha birqatar naqty tapsyrma berdi.
Aıdar О́risbaev.
Derek, sýret: akorda.kz.