ASTANA. 1 naýryz. Qurlyqtyq hokkeı lıgasynyń pleı-off kezeńin «Barys» jeńilispen bastady. Ombyda ótken oıynda astanalyqtar jergilikti «Avangardqa» 2:5 esebimen ese jiberdi. Bul týraly egemen.kz habarlady.
Bizdiń komanda oıyndy óte joǵary qarqynmen bastaǵan edi. Tipti 6-mınýtta Konstantın Pýshkarev mergendigimen kózge túsip, «Barys» esepte alǵa shyqty. Degenmen, oıynnyń 15 jáne 16-mınýttarynda eki birdeı oıynshymyz aıdynnan qýyldy. Aldymen, Konstantın Rýdenko 4 mınýtqa (2+2) aıdynnan alastatylsa, artynsha Kevın Dallmen 12 mınýttyq (2+10) aıyp ýaqytyn enshiledi. Berilgen múmkindikti múlt jibermegen ombylyqtar Dallmenniń aıdynnan qýylǵanyna 5 sekýnd ótpeı jatyp, tarazy basyn teńestirip ketti. Nátıjeli soqqynyń avtory – Denıs Kýlıash.
Ekinshi kezeń aıdyn ıeleriniń tártip buzýymen bastaldy. Oıynnyń 22-mınýtynda Aleksandr Perejogın kishi aıyppen jazalanyp, «Barys» oıynshy basymdyǵyna ıe bolǵan. Soǵan qaramastan, astanalyqtar óz qaqpalaryna shaıba jiberip aldy. Komandasyn esepte alǵa shyǵarǵan germanııalyq legıoner Felıks Shıýts.
Sheshýshi kezeńde jankúıerler tórt goldyń kýási boldy. Áýeli tartystyń 47-mınýtynda «Avangard» oıynshylary esepti 3:1-ge jetkizdi. Al oıynnyń sońǵy mınýtynda «Barystyń» bas jattyqtyrýshysy Andreı Nazarov táýekelge baryp, qaqpashy Iаn Lasonyń ornyna altynshy oıynshyny shyǵardy. Degenmen, aıdyn ıeleri bos qaqpany eki ret dál kózdep, oıyn barysynda soqqan shaıbalaryn beseýge deıin jetkizse, bizdiń hokkeıshiler bir shaıba soǵyp, esepti qysqartýǵa ǵana múmkindik tapty.
Qos komanda arasyndaǵy aıqas 1 naýryz kúni jalǵasady. Bul oıyndy da Ombyda ótkizetin «Barys» 3-4 naýryz kúnderi «Avangardty» óz aıdynynda qabyldaıdy. Pleı-off kezeńiniń kelesi satysyna tórt ret jeńiske jetken komanda shyǵatyny belgili. Ázirge jalpy esep ombylyqtardyń paıdasyna 1:0.
Elaman Qońyr.
Derek: egemen.kz.
Sýret: hawk.ru