Azyq-túlik qaýipsizdigin qamtamasyz etý baǵytyndaǵy is-sharalar eshqashan tolastaǵan emes. Ásirese el bıligi kókónis qoımalarynyń tapshylyǵyn joıý mindetin júktegeli beri óńirlerde jumys qyza tústi. Bul baǵytta Jambyl óńirinde de aýqymdy sharýalar atqarylyp jatyr. Oblys ortalyǵy Taraz qalasynda salynǵan úlken qoıma – sonyń dáleli.
Taraz qalasyna qarasty Qońyrtóbe turǵyn alabynda «TRZ AGRO» JShS-nyń bastamasymen salynǵan jańa kókónis saqtaý qoımasy paıdalanýǵa berildi. Qoımanyń ashylý saltanatyna qatysqan óńir basshysy Erbol Qarashókeev agrosektordy órkendetý baǵytynda atqarylyp jatqan jumystarmen tanysyp, kásiporyn ujymynyń qolǵa alǵan jobalaryna sáttilik tiledi.
Resmı derekke júginsek, irgeli jobanyń quny 1,8 mlrd teńgeni qurap otyr. Kókónis saqtaý qoımasyna 12 myń tonna ónim saqtaýǵa múmkindik bar. Soltústik Qazaqstan oblysynda qolǵa alynǵan tıimdi tájirıbeni engizý maqsatynda memleket tarapynan 995 mln teńge kóleminde qoldaý kórsetilipti. Jaýapty mamandardyń aıtýynsha, osy baǵyttaǵy jumysty ármen qaraı sátimen jalǵastyrýǵa múmkindik mol kórinedi.
«Bul kókónis qoımasy ýaqyt suranysyna saı zamanaýı tehnologııalarmen jabdyqtalǵanyn aıta ketken lázim. Mundaǵy qondyrǵylar Nıderland, Italııa, Reseı Federasııasy sekildi elderden jetkizilgen bolatyn. Biz úshin kókónis ónimderiniń sapasyn uzaq ýaqyt laıyqty saqtaýdyń mańyzy zor. Sol úshin nıderlandylyq tehnologııanyń tájirıbesine arqa súıep, eden asty jeldetý júıesin qoldanyp otyrmyz. Bul júıe qoımada saqtalatyn kókónis sapasynyń buzylmaýyn qamtamasyz etedi. Qysqasy, ozyq tájirıbelerdi engizý arqyly kósh basynda júrýdi kózdedik», deıdi seriktestik dırektorynyń orynbasary Ernar Saýranbaev.
Mundaǵy jumys barysymen tanysqan óńir basshysy Erbol Qarashókeev etti tereńdetip óńdeıtin zamanaýı keshen men jyl boıy úzilissiz jumys isteıtin jylyjaı kesheni jobasynyń áleýetin zerdelep, óz oıymen bólisti.
«TRZ AGRO» JShS dırektorynyń orynbasary Ernar Saýranbaevtyń aıtýynsha, etti tereń óńdeý kesheninde shıkizat tolyq kádege jaratylyp, óndiris qaldyqsyz tehnologııa qaǵıdatymen júzege asyrylady. Qazirgi tańda nysan qurylysynyń shamamen 70 paıyzy aıaqtalǵan. Keshen quramynda mal soıý jáne bólshekteý alańy, shujyq óndirý, konservileý sehtary, sondaı-aq qaıta óńdelgen ónim negizinde úı janýarlary men balyqtarǵa arnalǵan jem shyǵaratyn seh jumys isteıdi.
Mundaǵy jylyjaı kesheniniń birinshi kezeńiniń qurylysyn bıyl bastaý josparlanyp otyr. Jobada temperatýra men ylǵaldylyqty avtomatty túrde retteıtin júıelerdi, energııa únemdeıtin tehnologııalar men ónimdi qarqyndy ósirý tásilderin engizý kózdelgen. Bul joǵary ónimdilikke qol jetkizip, jyl boıy sapaly ónim óndirýge múmkindik beredi.
Mamandar keltirgen derekke sensek, úsh jobany júzege asyrý arqyly 300 jańa jumys ornyn ashý múmkindigi týady. Onyń ishinde kókónis saqtaý qoımasynda 30-dan astam adamdy maýsymdyq jumyspen qamtýǵa múmkindik bar eken.
«Mundaı ilkimdi jobalardyń óńir ómirinde alatyn aıryqsha orny bar ekenin atap ótken jón. Birinshiden, azyq-túlik baǵasyn turaqtandyrýǵa aıtarlyqtaı septigin tıgizedi. Ekinshiden, kókónis saqtaý jáne ótkizý júıesin jetildirýge, sondaı-aq aýyl sharýashylyǵy ónimderiniń sapasy men saqtaý merzimin arttyrýǵa yqpal etedi.
Jalpy, óńirde qolǵa alynǵan árbir aýqymdy joba oblys áleýetin ústemeleı túsetini daýsyz. Sondyqtan et óńdeý kesheni men jylyjaı qurylysynyń júıeli túrde júzege asý úshin jergilikti atqarýshy bılik ókilderi jan-jaqty qoldaý kórsetýi kerek. Sonda ǵana qolǵa alǵan sharýa ýaqtyly aıaqtalady», deıdi óńir basshysy.
Resmı derekke júginsek, Jambyl oblysy kókónis jáne baqsha daqyldaryn ósirý boıynsha elimizdegi jetekshi óńirlerdiń biri sanalady. Oblys respýblıka men ishki naryqty kókónis ónimderimen qamtamasyz etip otyr. Negizgi daqyldardyń biri – pııaz. Búgingi kúni óńir ishki naryqtyń pııazǵa degen suranysyn 100 paıyz qanaǵattandyryp otyrǵanyn aıta ketken lázim.
Aımaqta jalpy syıymdylyǵy 374 myń tonnaǵa jýyq 123 kókónis saqtaý qoımasy jumys isteıdi. 2028 jylǵa qaraı bul kórsetkishti 560 myń tonnaǵa deıin jetkizý josparlanǵan.
Jambyl oblysy,
Taraz qalasy