Adam quqyqtary jónindegi ýákil Artýr Lastaev Parlament Májilisinde ótken stalkıng pen qyz alyp qashýǵa qarsy is-qımyl máselelerine arnalǵan dóńgelek ústel barysynda órbigen pikirtalasqa qatysty óz pikirin bildirdi, dep habarlaıdy Egemen.kz.
«О́tken jyldyń kúzinde qyz alyp qashý áreketi úshin qylmystyq jaýaptylyqty kózdeıtin zań kúshine endi. Biz bul máseleni 2023 jyldan bastap kóterip kelemiz, sondaı-aq saraptamalyq jáne túsindirý jumystaryn júıeli túrde júrgizdik. Eń aldymen, aıqyn jaıtty atap ótken jón. Adam urlaýdyń kez kelgen túri zań talaptaryn óreskel buzý bolyp sanalady. Bul quqyqqa qaıshy áreket mádenıetke, ulttyq dástúrlerge, otbasylyq nemese kez kelgen ózge de ómirlik mán-jaılarǵa silteme jasaý arqyly eshqandaı erekshelik retinde tanylmaıdy jáne aqtaýǵa jatpaıdy», dedi Artýr Lastaev.
«Qyz alyp qashý» – aýyr qylmys
Adam quqyqtary jónindegi ýákil adam urlaý Qylmystyq kodeksiniń 125-babyna sáıkes 15 jylǵa deıin bas bostandyǵynan aıyrý túrindegi qatań jazaǵa ákep soǵatynyn eske saldy. Sondaı-aq ol bul qylmystyń qazaq halqynyń dástúrlerine de, ádet-ǵuryp quqyǵyna da eshqandaı qatysy joq ekenin aıtty.
«Neke uǵymy Qazaqstan Respýblıkasynyń Konstıtýsııasynda «memleket belgilegen tártippen tirkelgen er men áıeldiń erikti jáne teń quqyqty odaǵy» retinde bekitilgen. Bul normanyń ózge túrde túsindirilýine jol berilmeıdi. Eger eki kámeletke tolǵan azamat otbasy qurý týraly sheshim qabyldap, ata-anasynyń úıinen bólek shyqsa, zań olarǵa birlesken ómir súrý quqyǵyn júzege asyrýdyń zańdy jolyn ýákiletti organda qatynastaryn tirkeý arqyly usynady», dedi ol.
Qyz alyp qashý zańmen qýdalanady
Artýr Lastaev pikir sońynda el azamattaryn Konstıtýsııa men ózge de zańdardyń talaptaryn qatań saqtaýǵa shaqyrdy.