KО́KShETAÝ. 1 naýryz. Aqmola oblysy Qazaqstan Halyqtary assambleıasynyń 20 jyldyǵyn keń kólemde atap ótti. Bul týraly egemen.kz tilshisi habarlady.
«Dostyq» qoǵamdyq kelisim úıinde ótken sharaǵa atalǵan uıymnyń belsendileri men qala jurtshylyǵy jınaldy. Oblys ákimi, Assambleıanyń Aqmola oblystyq fılıalynyń tóraǵasy S.Kýlagınniń atynan onyń orynbasary Marzııat Tohaeva jurtshylyqty aıtýly merekemen quttyqtady. Ol: «Elbasy, Ult Kóshbasshysy Nursultan Nazarbaevtyń bastamasymen qurylǵan Assambleıa kóp ultty halqymyzdy uıystyrýshy, konstıtýsııalyq bedeldi organ retinde qalyptasty», – dedi. Sondaı-aq, Marzııat Iýsýpovna oblysta 43 etnomádenı ortalyq belsendi jumys istep jatqanyn aıtty.
Qoǵamdyq uıymdar ótkizip jatqan tanymdyq sharalar kóp ultty halqymyzdyń qundy dástúrleri men mádenı jaýharlaryn ashyp kórsetýde. Oblysymyz Assambleıa jylynyń alǵashqy aksııasy – «Qazaqstan halqy Assambleıasy – 20 izgi is» qozǵalysynyń sımvoly «Taıqazandy» birinshi bolyp qabyldap aldy. Respýblıkalyq estafeta sheńberinde Aqmola oblysy «Meıirim» qaıyrymdylyq aksııasyn ótkizip, 752 otbasyna 17 mıllıon teńge kóleminde kómek kórsetti. Odan bólek, «Assambleıa – birlik jolynda», «Beıbitshilik pen túsinistiktiń jol Kartasy» syndy megajobalar jurtshylyqtyń yqylasyn aýdardy. Qazaqstan Halqy assambleıasy keńesiniń kezekten tys Prezıdent saılaýyn ótkizý jónindegi usynysyn aqmolalyqtar qyzý qoldap, taǵdyrsheshti saıası oqıǵaǵa belsendilikpen qatysatynyn jetkizdi.
Merekelik sharada birneshe ult ókilderi oblys jurtshylyǵyn quttyqtap, óz tilekterin bildirdi. Solardyń qatarynda Assambleıanyń múshesi, oblystyq «Qazaq tili men mádenıeti» qoǵamdyq uıymynyń tóraǵasy Meırambek Qıyqov, Kókshetaý qalasynyń Qurmetti azamaty, jazýshy Syrym Rahımov, Qazaqstan tatarlary assosıasııasy ardagerler keńesiniń tóraǵasy Farýk Bogapov, qaladaǵy Nazarbaev zııatkerlik mektebinde dáris berip júrgen amerıkalyq ustaz Patrısııa Kýlıneın elimizdiń saıası ómirinde salmaqty oryn alatyn Assambleıanyń mán-mańyzy týraly keleli áńgime qozǵady.
Shara barysynda Assambleıa qurdastary Kókshetaý tehnıkalyq ınstıtýtynyń kýrsanty Áketaı Janbolat, J.Mýsın atyndaǵy qazaq pedagogıkalyq kolledjiniń oqýshysy Aıjan Qusman, Sh.Ýálıhanov atyndaǵy Kókshetaý memlekettik ýnıversıtetiniń stýdenti Aqnur Dilmuqash, A.Myrzahmetov atyndaǵy ýnıversıtettiń stýdenti Erbolat Baltınge qurmet kórsetilip, aqjaýlyqty ájeler batasyn berdi.
Baqbergen Amalbek.
Derek, sýret: egemen.kz.