Qostanaıda Batys Qazaqstan oblysynyń mádenıet jáne óner kúnderi ótti. Bul Elbasy Nursultan Nazarbaevtyń tapsyrmasyna sáıkes, Mádenıet jáne sport mınıstrligi jasaǵan «Oblystar aptalyǵy» kestesi aıasynda júzege asty. Qazaqtyń baıtaq dalasynyń Batysy men Arqa tórinde tolqyp aqqan Aq Jaıyq pen Tobyldyń tolqyny uqsas. Topyraǵy qunarly eki óńir de halqymyzdyń Mahambet pen Syrymdaı, Juban men Qadyrdaı, Shoqan men Ybyraıdaı, Shaqshaq Jánibek pen Tátiqaradaı, Ahmet pen Mirjaqyptaı batyrlary men danalaryn, ǵalymdary men aqyndaryn, ánshi-kúıshilerin, qaıratkerlerin berýimen qasıetti. Aq Jaıyqtyń sálemin alyp kelgen oblystyq mádenıet, arhıvter men qujattama basqarmasynyń basshysy Dáýletkereı Qusaıynov bastaǵan bastysqazaqstandyq delegasııany Qostanaı jurty aqjarma kóńilmen qarsy aldy. Bul kezdesý Ybyraı Altynsarın babamyzdyń «Aıshylyq alys jerlerden, jyldam habar alǵyzdy» degen bilimmen, ǵylymmen keletin órkenıet jetistikteri týraly danalyq boljamyn on orap ketken, aqparatty kózdi ashyp-jumǵansha jetkizetin búgingi ınternet zamanynda ómir súrip otyrǵanmen, aǵaıynmen dos-qushaqtar aıqasyp, kózbe-kóz júzdesýdiń orny bólektigin kórsetti.
– Aqynymyz, ánshi-kúıshimiz, kitap, mýzeı kórmemiz bar, barlyǵy eki júzden asa adam keldik. Qostanaılyqtar óte jaqsy qarsy aldy. Batys Qazaqstannyń rýhanı baılyǵyn pash ettik. Aralasyp-quralasqanǵa ne jetsin, – deıdi Dáýletkereı Ataýuly.
Qostanaılyqtar qazaqtyń belgili aqyn qyzy, Halyqaralyq «Alash» ádebı syılyǵynyń, «Qurmet» ordeniniń ıegeri, Qazaqstannyń eńbek sińirgen qaıratkeri Aqushtap Baqtygereevamen «Aq Jaıyq. Aq shaǵala. Aqushtap» atty jyr keshinde jolyqty. Aqushtap Oralda tursa da, ol Qostanaıǵa da, barsha qazaqqa da ortaq. Sondyqtan aqyn da sózin: «Ortaq dep barshamyzǵa Aspan, Aı, Kún, Qashan da qushaǵymdy dosqa jaıdym. Elinen Qyz Jibektiń jyr ákeldim, Tórine shashaıyn dep Qostanaıdyń» dep bastady. Jyrsúıer qaýymǵa Aqushtap óleńderin oraldyq jastarmen qatar, aqynnyń ózi de oqydy. Qashan da dostyq, shyndyq, ádilet, eldik týyn joǵary kóterip júrgen aqyn bul joly da óz oı-pikirlerimen bólisti. Sahnadan Aqushtap óleńderine jazylǵan ánder shyrqaldy.
О́zi «qazaqtyń qyzdarynyń jalaýysyń» dep úlgi tutqan Márııam Hakimjanova apasynyń aýylyna kelgen Aqushtap týraly qostanaılyq aqyn-jazýshy aǵalary men inileri J.Baıazıd, Ǵ.Ahmetchın, A.Shaıahmet aqjarma lebizderin aıaǵan joq. «Talanttyń asaý tizginin, júrgender bar ǵoı shaqqa ustap. Saǵyntyp júrgen qyz kúnin, oshaqta qalǵan shoqqa uqsap. Áldılep júrip bóbegin, tamyzyq qylyp óleńin, qaınatqan qazaq qazanyn, qyzdyrǵan tirlik bazaryn. Jasaı ber, aqyn Aqushtap!» dep qaıyrdy Aqylbek Shaıahmet.
Qostanaılyqtar Jaıyq boıynyń tarıhyn, óneri men dástúr baılyǵyn kóz aldyńa ákeletin «Batys Qazaqstan – Eýrazııa júreginde» atty tarıhı- etnografııalyq kórmeni tamashalady. Árıne, qazaq dalasynyń qaı pushpaǵy da halqymyzdyń tarıhı tamyrynyń tereńde ekenin pash etedi. Kórmeniń baılyǵy tańdaı qaqqyzǵandaı edi. Munan keıin Ǵ.Qurmanǵalıev atyndaǵy Batys Qazaqstan oblystyq fılarmonııasy ujymynyń «Aq Jaıyqtan tolqyndy Tobylǵa» atty konserti usynyldy. Konsert bastalarda sóz alǵan Qostanaı oblysy ákiminiń orynbasary Murat Dáribaev pen Batys Qazaqstan oblysy ákiminiń orynbasary Baqtııar Máken eki oblystyń ekonomıkalyq jáne rýhanı, mádenı baılyqqa kende emes ekenin aıta kelip, oblystardyń qaı salada da aralasýy jaqsy dástúr ekenin tilge tıek etti. Elbasy tapsyrmasynyń óris alatynyna sendirdi.
Qazaqstan Respýblıkasynyń eńbek sińirgen ártisi, jeztańdaı ánshi Jumaǵanym Rahymova bastaǵan talanttar ánnen shashý shashty. Sonymen qatar, qostanaılyqtar Sh.Aıtmatovtyń shyǵarmasy boıynsha Batys Qazaqstan oblystyq drama teatry ujymy qoıǵan «Jámıla» spektaklin tamashalady. Qos ózen Aq Jaıyq pen Tobyldyń tolqyny dúr, eliniń armany bir qos óńir – qos oblys halqymyzdyń ortaq óneri, mádenıeti men salty arqyly kórisip, arqa-jarqa bolyp qaldy. О́ńir men óńirdiń aralasýy men kezdesýler bolashaq ıgi bastamalardyń, jaqsy isterdiń de bastaýyna aınalary haq.
Názıra JÁRIMBETOVA,
«Egemen Qazaqstan».
QOSTANAI.