Almaty qalasynan «Qazaqstan halqy Assambleıasy – 20 ıgi is» patrıottyq aksııasynyń sımvoly bolǵan kıeli Taıqazan saltanatty túrde Jambyl oblysyna jol tartty.
Elimizdi meken etken birneshe ult pen ulys ókilderiniń tatýlyǵy men turaqtylyǵynyń sımvoly, qazaq halqynyń álemdegi beıbit te berekeli ómirge qosqan úlesiniń tumary ispetti qasıetti Taıqazannyń kishireıtilgen nusqasy Qazaqstannyń iri qalalary men oblys ortalyqtaryna aıaldap, ıgilikti isterdi nasıhattap júr. Sol ıgi aksııanyń aıasynda «Qazaqstan halqy Assambleıasy – 20 ıgi is» atty respýblıkalyq patrıottyq sherý Almaty qalasynan qasıetti Áýlıeata jerine jol tartty.
Almatydaǵy Dostyq úıinde ótken sharaǵa qaladaǵy túrli etnomádenı birlestikterdiń ókilderi, Uly Otan soǵysynyń ardagerleri, memlekettik emes qoǵamdyq uıymdardyń belsendileri men joǵary oqý oryndarynyń jastary jınaldy. Tatýlyq pen dostyqtyń kıeli shańyraǵyna aınalǵan Dostyq úıinde Qazaqstandy meken etken ár ult ókilderiniń mádenı-shyǵarmashylyq kórmeleri qoıylyp, ulttar dostyǵyn nasıhattaıtyn teatrlandyrylǵan sharalar uıymdastyryldy.
– Aqpan aıynyń sońynda biz ózimizdiń shyǵysqazaqstandyq áriptesterimizden Taıqazandy saltanatty túrde qabyldap alǵan bolatynbyz. Jáne osy Qazaqstan halqy Assambleıasy qurylǵan kún – 1 naýryzda, Assambleıanyń alǵashqy sessııasy ótken qala – Almatynyń atqarǵan ıgi isterin Jambyl oblysyna tabystap otyrmyz, – dedi Almaty qalalyq Qazaqstan halqy Assambleıasy tóraǵasynyń orynbasary Maıra Abdalıeva.
Sharada qalada ornalasqan 34 etnomádenı birlestiktiń ónerpazdary daıyndaǵan konserttik kesh pen Uly Otan soǵysy ardagerlerine arnaıy jasalǵan tartý-taralǵylar, áleýmettik az qamtylǵan otbasy múshelerine jasalǵan járdem men jastar uıymynyń Qazaqstan halqy Assambleıasy tarapynan halyqqa kórsetilip otyrǵan qyzmetin baıandaıtyn sahnalyq kórinister, ulttyq án-bı men qolóner sheberleriniń buıymdary usynyldy.
Qanat ESKENDIR,
«Egemen Qazaqstan».
ALMATY.
Sýretti túsirgen
Sársenbek QYZAIBEKULY.