ASTANA. 19 tamyz. Memlekettik hatshy Gúlshara Ábdiqalyqova eldiń bilim berý júıesiniń qyzmetkerlerimen kezdesti. Bul týraly akorda.kz habarlady.
Kezdesýge Bilim jáne ǵylym mınıstri A.Sárinjipov, sondaı-aq aýyl muǵalimderi, jańashyl pedagogtar, pedagogıkalyq jáne ǵylymı mekemelerdiń basshylary qatysty.
Shara barysynda Gúlshara Ábdiqalyqova qatysýshylardyń nazaryn Nursultan Nazarbaevtyń «básekege qabiletti damyǵan memleket bolý úshin biz saýattylyǵy joǵary elge aınalýymyz kerek» degen sózine aýdardy. Sonymen qatar, ol adamı kapıtaldyń sapasyn Ekonomıkalyq yntymaqtastyq jáne damý uıymy elderiniń standarttary negizinde arttyrý bilim berý júıesin jańǵyrtýdyń «100 naqty qadam» – Ult jospary aıasyndaǵy osy kezeńiniń basty ereksheligi ekenine toqtaldy.
Bıyl bilim berýdiń 2011-2020 jyldarǵa arnalǵan memlekettik baǵdarlamasynyń birinshi kezeńin iske asyrý aıaqtalady. Osy ýaqyt ishinde bastaýysh bilim berýdiń jalpyǵa mindetti memlekettik standarty qabyldandy, mektepke deıingi, jalpy orta bilim berý standarttarynyń jobalary ázirlendi, pedagogıkalyq kadrlardyń biliktiligin arttyrýdyń túbegeıli jańa júıesi quryldy.
Mektepke deıingi bilim berý júıesi tabysty damyp keledi. Qazirgi ýaqytta elimizde 8780 mektepke deıingi mekeme jumys isteıdi, al 3-6 jas aralyǵyndaǵy balalardyń qamtylýy 78,6 paıyzǵa deıin jetti.
Elimizdiń barlyq óńirlerinde balalardy oqytýdyń jáne tárbıe berýdiń jańashyl ınnovasııalyq tásilderin tabysty engizip kele jatqan 19 Nazarbaev zııatkerlik mektebi qurylyp, jumys isteýde.
Jalpy jáne kásibı tehnıkalyq bilim berý júıesinde dýaldyq oqytýdyń jańa tehnologııalary engizilýde. «100 naqty qadamdy» iske asyrý aıasynda ekonomıkanyń negizgi 6 salasy úshin bilikti kadrlar daıarlaý maqsatynda 10 kolledj belgilendi.
Respýblıkamyzda 125 joǵary oqý orny jumys isteıdi, sonyń 29 -y joǵary jáne joǵary oqý ornynan keıingi bilim berýdiń 252 mamandyǵy boıynsha Halyqaralyq mamandandyrylǵan akkredıtasııadan ótti.
Kezdesý kezinde Memleket basshysy usynǵan Bes ınstıtýsıonaldyq reformanyń aıasyndaǵy, sondaı-aq pedagogtardyń mártebesin kóterýge, aýyl mektepteriniń, tehnıkalyq bilim berý mekemeleriniń, ǵylymı jáne pedagogıkalyq uıymdardyń jumystaryna baılanysty ózekti máseleler talqylandy.
Talqylaý nátıjesi boıynsha Memlekettik hatshy quzyrly memlekettik organdarǵa birqatar naqty tapsyrma berdi.
Kezdesý sońynda, G.Ábdiqalyqova eldegi barsha pedagogtardy jańa oqý jylymen quttyqtap, olarǵa zor densaýlyq, shyǵarmashylyq tabys, baqyt jáne ıgilik tiledi.
Aıdar О́risbaev.
Derek: akorda.kz.
Sýret: egemen.kz.