Memleket basshysy Nursultan Nazarbaev barsha qazaqstandyqtardy Qazaqstan halqy Assambleıasynyń 20 jyldyǵymen quttyqtady, dep habarlady Prezıdenttiń baspasóz qyzmeti. Quttyqtaýda bylaı delingen:
Qurmetti qazaqstandyqtar!
Barshańyzdy Qazaqstan halqy Assambleıasynyń 20 jyldyǵymen shyn júrekten quttyqtaımyn.
Qazaqstan halqy Assambleıasy – beıbitshilik pen kelisimniń, qasıetti Otanymyzda ómir súrip jatqan barlyq etnostar dostyǵynyń eń basty jáne berik irgetasy. Ol eldigimizdiń qalyptasý, Táýelsizdigimizdiń nyǵaıý tarıhynda, Qazaqstan Respýblıkasynyń Konstıtýsııasyn jalpy halyq bolyp qabyldaýda, tereń ekonomıkalyq reformalar júrgizýde jáne qoǵamymyzdyń áleýmettik jáne saıası negizin aýqymdy jańǵyrtýda aıryqsha ról atqardy.
Qazaqstan halqy Assambleıasy bizdiń kópultty halqymyzdyń birligin saqtaıtyn máńgilik qorǵanyna aınaldy. Ol birlik, turaqtylyq, toleranttyq, jalpyǵa ortaq eńbek, patrıotızm sııaqty ortaq qundylyqtarymyzdy qazaqstandyqtardyń sanasyna sińirýde.
О́ziniń kúndelikti, tynymsyz jumysy arqyly ol el azamattarynyń júregine Máńgilik Elimizge jáne Qazaqstan atty teńdessiz de tatý otbasynyń múshesi ekenine degen maqtanysh sezimi men joǵary jaýapkershiligin uıalatady.
Búginde Qazaqstan halqy Assambleıasy elimizdiń «Qazaqstan-2050» Strategııasyn, «Nurly Jol» Jańa Ekonomıkalyq Saıasatyn júzege asyrý jolyndaǵy jasampazdyq eńbeginiń basynda júr, ol qazaqstandyqtardy ortaq Otanymyzdyń baıandy búgini men uly bolashaǵy jolynda biriktire túsýde.
Qazaqstan halqy Assambleıasyna jáne barsha qazaqstandyqtarǵa beıbitshilik pen kelisimniń týyn bıik ustap, halqymyzdyń dostyǵy men birligin nyǵaıtyp, qasıetti Otanymyz – Qazaqstan Respýblıkasynyń ıgiligi úshin aıanbaı eńbek etýdi tileımin.