Keshe Ortalyq kommýnıkasııalar qyzmetinde «Astana halyqaralyq áýejaıy» AQ-tyń basqarma tóraǵasy Qaırat Jaýhanov baspasóz máslıhatyn ótkizdi. Ol áýejaıdyń qaıta qurylymdalyp, jańarýy jóninde áńgimelep, jýrnalısterdiń suraqtaryna jaýap berdi.
Memleket basshysy «Nurly Jol – bolashaqqa bastar jol» atty Joldaýynda osy jyly Astana áýejaıynyń jańa termınal qurylysy men jańa ushý-qoný jolaǵyn salý úshin Ulttyq qordan qarajat bólý qajettigin ataǵan bolatyn. Nátıjesinde, áýejaıdyń jolaýshy qabyldap-jóneltý qabileti 2017 jylǵa qaraı 7,5 mln. adamǵa deıin ulǵaıtylatynyn aıtqan edi.
Osy jóninde áńgimelegen spıker, Elbasy Joldaýynda berilgen tapsyrmalardyń tolyq oryndalyp jatqanyn aıta kelip, áýejaıdyń endigi jańa aýmaǵy 45 myń sharshy metrdi quraıtynyna toqtaldy. «Búgingi kúni áýejaı qoldanysyndaǵy termınal óziniń resýrstaryn tolyǵymen sarqyp boldy. Sebebi, jolaýshylardy qabyldaý aǵyny úsh mıllıon adamǵa jetedi. Sondyqtan, EKSPO-ǵa baılanysty salynatyn jańa jolaýshylar termınalynyń kólemi artyp, onyń aýmaǵy 45 myń sharshy metrdi quramaq. Al jolaýshylar ótkizý qabileti jylyna 7,5 mln. adamǵa jetedi», dedi Q.Jaýhanov.
Búginde Ulttyq qordan halyqaralyq áýejaı termınalyn qaıta jańǵyrtý jumystaryna 29 mlrd. teńge bólingeli tur eken. Budan bólek, qosymsha qarjy aksıonerler tarapynan quıylyp, zaemdyq qarajattar da tartylatyn kórinedi. Osyny aıtqan basqarma tóraǵasy, Astana áýejaıy Qazaqstanda jolaýshylarǵa qyzmet kórsetý boıynsha ekinshi orynda turǵanyn tilge tıek etti. Onyń sózine ılansaq, Astana halyqaralyq áýejaıynyń jolaýshylar aǵyny jyl saıyn shamamen 11-12 paıyzǵa artyp keledi eken. Mysaly, 2010 jyly jolaýshylar aǵyny 1 mln. 600 myń adamǵa jetken bolsa, 2014 jyly jolaýshy sany 3 mln. mejeni eńseripti. Jolaýshylar sanynyń artýyna birinshi kezekte avıakompanııalardyń jańa baǵyttardy ashýy sebep bolypty. Ushý baǵyttarynyń jıiligi de bul kórsetkishke serpin beripti.
Nurbaı ELMURATOV,
«Egemen Qazaqstan».