Qalamy – qýat, júregi – shýaq
Jastyq jigerin parasatymen shyńdaǵan,
Júrektiń jyryn aqyl-oıymen tyńdaǵan.
Jasampaz jyldar janynda onyń týlaǵan,
Jalyny laýlap, daýyly samǵap, tynbaǵan,
Jaqsy aǵam meniń, qýatty aǵam, nurly aǵam.
Qýanysh aǵam, shýaqty aǵam, nurly aǵam,
Qulager-oıy qııanǵa shaýyp turmaǵan.
Qııaly sonaý ǵaryshqa samǵap, zýlaǵan,
Qasynda ylǵı jańa men ozyq dýlaǵan,
Qaıratker aǵam, jańashyl aǵam, nurly aǵam.
Qýanysh aǵam, qýanǵan eli, nurly aǵam,
Qoǵamnyń sózin qulaqqa quısa, syr baǵam.
Qazaqtyń sózin qalaýyn taýyp qyrnaǵan,
Qapyda soqqan qara daýylǵa synbaǵan,
Qaraǵaı boıly, danadaı oıly, nurly aǵam.
Qalamy júırik, qadamy qutty nurly aǵam,
Qaraýly sózge qabaǵyn áste burmaǵan,
Qanatty jyldar qadirin onyń buldaǵan,
Qalaýly jerde qazaqtyń dilin kórsetken,
Qashanda alda saptaǵy sardar, nurly aǵam.
Qýanysh aǵam, kóńili teńiz, nurly aǵam,
Qýatty sózben ómiri egiz, tyńdaǵam.
Qaıyryp aıtyp, qýanyp talaı jyrlaǵam,
Qalamy – qýat, júregi – shýaq bilgenge,
Qazaqqa bitken osyndaı adam, nurly aǵam.
«Jetpiste» deıdi, jetpisi nesi, shúbám bar,
Jerine jetpeı tómenge túspes qyrandar.
Júreginde onyń aıtylar áli myń án bar,
Jigittiń jasyn jurtynan ǵana surańdar,
Janary árkez jarqyldap, janyp urandar.
«Jetpiste» deıdi, jetpisiń degen osy-aq pa,
Júgenin salar, erlerin erttep qos atqa.
Júırikke qumar jigittiń janyn bosatpa,
Jarqyldap júrgen Qýanysh aǵam, qarasam,
Jup otyz besińdi quryqtap alǵan qosaqqa.
Jalaýyn tiksin jarqyldap jetken armandar,
Japyraq jaısyn jaqsy bir jolǵa barǵandar.
Júgirip jetsin artynan onyń qalǵandar,
Jalyqpaı turyp, anyqtaı turyp sanaıyq,
Júzden keıin de júrekke jaqyn sandar bar.
Armanshyl oıy alǵa da tartqan sanasyn,
Adal bop súıgen keń-baıtaq qazaq dalasyn,
Adamı istiń ýaqytqa qaqqan taǵasyn,
Allanyń bergen jasyna jetkin, jaqsy aǵa,
Alaqan soǵyp, qýana bersin alashyń.
О́tegen ORALBAIULY.