The Wall Street Journal gazetinde jarııalanǵan atalmysh baıandamada eń optımıstik boljam boıynsha munaı baǵasy 2025 jylǵa deıin 1 barreli 76 dollar kóleminen aspaıtyn bolady, dep atap kórsetilgen. OPEK mundaı boljamdy Amerıkanyń munaı naryǵyndaǵy qalyptasqan ahýalǵa baılanysty keltirip otyr. Sonymen birge, gazettiń atap kórsetkenindeı, baıandamada 2025 jyly munaı baǵasynyń árbir barreli 40 dollarǵa deıin tómendep ketý múmkindigi de qarastyrylǵan. Baıandamada atap kórsetilgendeı, 2025 jylǵa deıin munaı baǵasynyń árbir barreliniń 100 dollarǵa deıin kóterilýi tipti de múmkin emes kórinedi.
The Wall Street Journal basylymy aldaǵy jyldary munaı baǵasynyń turaqsyzdyǵy saqtalatyndyǵyn aıtady. Osy rette gazet OPEK uıymyna múshe memleketter mınıstrleriniń maýsym aıynda bolatyn kezdesýine baılanysty munaı baǵasynyń taǵy da kúrt qubylýyn joqqa shyǵarmaıdy.
«AQSh-ta oryn alǵan «taqtatas tóńkerisine» baılanysty munaı baǵasynyń kúrt tómendep ketken oqıǵasyn OPEK áli kúnge jete zertteı almaı otyr. Ádette munaı karteli álemdik naryqtaǵy munaı baǵasyn retteý úshin munaı óndirý kólemin azaıtyp, rynokqa shyǵarylatyn munaı kólemin rettep otyratyn. Alaıda, ótken jyly OPEK mundaı tásildiń endi tıimdilik bermeıtindigin moıyndady. Sonymen birge, uıymǵa múshe memleketter, atap aıtqanda, Saýd Arabııasy munaı óndirý kólemin arttyryp, rynokqa úlken mólsherde shıki munaı shyǵarýdy júzege asyrdy. OPEK basshylarynyń málimdeýinshe, munaı baǵasy neǵurlym tómendegen saıyn munaı óndirýdiń ózindik quny joǵary bolyp otyrǵan kompanııalar bankrotqa ushyraıdy. Ásirese, munaı baǵasynyń tómendeýinen taqtatas munaıyn óndiretin kompanııalar zardap shegetin bolady.