Batyrǵa eskertkish ornatyldy

Tarazda surmergen Ybyraıym Súleı­menovke eskertkish ornatyldy. Uly Otan soǵysynyń tarıhyna kóz júgirter bolsaq, 1941 jyly Qyzyl Armııa qataryna shaqyrylyp, quralaıdy kózge atqan mergen bolǵan Y.Súleımenov Kalının maıdanyndaǵy alǵashqy shaıqastardyń ózinde vıntovkasymen 79 fashısti jer jas­tandyrady. Velıkıe Lýkı qalasy úshin bolǵan shaıqasta 60, al, 1943 jyly kúzinde Nevel qalasy úshin bolǵan keskilesken shaıqasta 102 fashıstiń kózin joıyp, ózi de erlikpen qaza tabady. Sol qandy shaıqasta surmergen batyr qazaqtyń aıaýly qyzy, pýlemetshi Mánshúk Mámetova ekeýi bir kúnde, bir maıdan shebinde Otan úshin janyn pıda etti. Ekeýiniń de súıegi Nevel qalasynda jerlenedi. Byltyr Nevel qalasyndaǵy Ybyraıym Súleımenov atyndaǵy kóshede batyrǵa arnalǵan memorıaldy taqta ashylǵan bolatyn. «Bizdiń Ybyraıymǵa eshkim teń kelmeıdi. Otan soǵysynda qazaqta Súleımenovten asqan mergen joq. Bizdiń Súleımenov Sovet Odaǵynyń batyry bolady» deýshi edi batalon komandıri Ýshakov», dep jazǵan eken ol týraly halyq jazýshysy Ázilhan Nurshaıyqov. Al, jyr alyby Jambyl Jabaev 1943 jyly 100-shi atqyshtar brıgadasynan alǵan hatyna jaýap qaıyrǵanda: Qyraǵy qyrdyń qyrany, Dalanyń ushqyr qulany. Taýdyń júırik bulany, Fashısterdi eki júz, Otyz toǵyzyn óltirgen, Súleımenov Ybyraıym, Qazaqtyń batyr ulany, – dep jyrlaǵan eken. Áıtse de Ybyraıym Súleımenov 1943 jyly shilde aıynda Keńes Odaǵynyń Batyry ataǵyna usynylǵanymen belgisiz sebeptermen jiberilgen qujat ózgertilip, Lenın ordenimen marapattaldy. Endi, mine, Taraz qalasynda batyr atyndaǵy kóshede surmergen jaýyngerge arnalǵan eńseli eskertkish boı kóterdi. – Halqymyzdyń maqtan tutar arda uly, quralaıdy kózge atqan surmergen Ybyraıym Súleımenov óziniń jas ómirin qasıetti Jeńis jolynda qurban etti. Esimi Uly Otan soǵysy tarıhynda altyn árippen jazylyp qaldy. Halqymyz «El úmitin er aqtar, er ataǵyn el saqtar» dep aıtqanyndaı, eliniń úmitin aqtap, halqynyń beıbit bolashaǵy úshin janyn qıǵan batyrdy el de umytpaq emes, – dedi eskertkishtiń ashylý rásiminde Jambyl oblysynyń ákimi Kárim Kókirekbaev. Dańqty batyr Ybyraıym Súleı­menovtiń músini ornalasqan jer aýmaǵy 800 sharshy metrdi quraıdy. Músin avtory – Qazaqstan Sýretshiler odaǵynyń múshesi Momysh Seıitkerim.   Oralhan DÁÝIT, «Egemen Qazaqstan». Sýretti túsirgen Aqádil RYSMAHAN. TARAZ.