AQTAÝ. 16 mamyr. Aqtaýda jantúrshigerlik kólik apaty boldy. Apattyń joıqyndyǵy sonshalyq, kóliktiń saý-tamtyǵy qalǵan joq. Alaıda, eń qýanyshtysy, adam shyǵyny tirkelmedi. Bul týraly tumba.kz saıtyna silteme jasap, egemen.kz tilshisi habarlady.
Oqıǵa búgin túnde jergilikti ýaqyt boıynsha saǵat 01:00-der shamasynda bolǵan. Qaladaǵy 8-shi shaǵyn aýdanda ornalasqan botanıkalyq baq pen 22-shi shaǵyn aýdandaǵy eski bazar arasyndaǵy jol qıylysynda tirkelgen apatta órt sóndirýshi kólik pen «Opel vektra» soqtyǵysty.
Aqtaý qalalyq tótenshe jaǵdaılar basqarmasynyń basshysy Erlan Máýlenovtiń aıtýynsha, kezekshi bólimge órt shyǵýyna baılanysty dabyl túsken. Sol boıynsha 3 órt sóndirýshi kólik shuǵyl oqıǵa ornyna attanady. Dabyl qondyrǵysyn qosyp kele jatqan kólikterdiń aldyńǵy ekeýi atalǵan jol qıylysynan aman ótken. Al úshinshisi jeńil kólikpen soqtyǵysty.
Tótenshe jaıt saldarynan júrgizýshiler jeńil jaraqat alǵan. Aýrýhanaǵa jetkizilip, qajetti dárigerlik kómek kórsetilgennen keıin olar úılerine jiberildi.
Kýágerlerdiń aıtýynsha, apat óte joıqyn bolǵan. Saldarynan jeńil kólik 100 paıyz jaramsyz bolyp, qur metallǵa aınalǵan. Alaıda, júrgizýshisi din-aman. Mamandar mundaı sáttiliktiń óte sırek kezdesetinin, tipti 100-den biri ǵana aman qalatynyn aıtýda.
Gúlaıym Shyntemirqyzy.
Derek: egemen.kz.
Sýret: tumba.kz.