ShYMKENT. 4 naýryz. Shymkent qalasynda sheteldik markaly qymbat kólikterdi aıdap áketýmen aınalysqan 24 jastaǵy kúdikti ustaldy. Bul týraly Ońtústik Qazaqstan oblystyq ishki ister departamentiniń baspasóz qyzmetine silteme jasaǵan egemen.kz habarlady.
Ústimizdegi jylǵy 24 qańtarda Shymkent qalasynyń 38 jastaǵy turǵyny qalalyq ishki ister basqarmasynyń ál-Farabı polısııa bólimine baǵasy 30 myń dollar turatyn Lexus LX 570 avtokóligin belgisiz bireýdiń aıdap alyp qashyp ketkeni jóninde aryzdanǵan. Arada eki apta ótkende, osyndaı shaǵymmen Shymkenttiń Qarataý aýdanynyń 48 jastaǵy turǵyny polısııa bólimine baryp, 82 myń dollar turatyn Toyota Land Cruiser kóligi urlanǵanyn aıtyp kelgen.
«Jedel-izdestirý sharasy barysynda Shymkent qalalyq ishki ister basqarmasynyń ál-Farabı polısııa bóliminiń qyzmetkerleri qymbat avtokólikterdi aıdap ketip júr degen kúdikpen oblys ortalyǵynyń 1991 jyly týǵan turǵynyn ustady. Polısııa qyzmetkerleriniń anyqtaýynsha, kúdikti arnaıy elektrondyq qurylǵynyń kómegimen avtokólikterdiń esigin ashyp, aıdap ketip otyrǵan», - delingen habarlamada.
Polıseılerdiń málimetine qaraǵanda, jigit avtoturaqtarda turǵan jáne ıesiniń qaraýynsyz qalǵan avtokólikterdi tańdap, esigin ashý arqyly aıdap ketip otyrǵan jáne urlanǵan kólikterdi jaldamaly úılerde jasyrǵan. Polısııa qyzmetkerleri kúdiktini sol úılerdiń biriniń aýmaǵynda qylmys ústinde ustady.
Ustalǵan azamattyń avtokólik urlyǵy boıynsha tórt qylmysqa qatysy bar ekeni anyqtaldy. Ol aıdap áketken kólikterin satyp, tapqan aqshasyn óz qajetine jaratpaqshy bolypty. Jábirlenýshilerge keltirilgen shyǵynnyń kólemi - 300 myń dollarǵa jýyq.
«Aıdap ketken eki avtokólik pen elektrondyq qurylǵy aıǵaq zat retinde alyndy. Kúdiktiniń ústinen Qylmystyq kodekstiń 200-baby (Avtokólikterdi zańsyz aıdap ketý) boıynsha qylmystyq is qozǵaldy.
«Kúdikti qazir qamaýda otyr. Tártip saqshylary onyń basqa da qylmystarǵa qatysy bar-joǵyn anyqtap, tergeý amaldaryn júrgizip jatyr», - delingen habarlamada.
Baqtııar Taıjan.
Derek: Ońtústik Qazaqstan oblystyq ishki ister departamentiniń baspasóz qyzmeti.