ASTANA. 4 naýryz. Qurlyqtyq hokkeı lıgasynyń pleı-off kezeńinde synǵa túsip jatqan «Barys» tórtinshi oıynynda Ombynyń «Avangardynan» 3:4 esebimen jeńildi. Bul týraly egemen.kz habarlady.
Alǵashqy kezeń qonaqtardyń paıdasyna aıaqtaldy. Oıynnyń nebári 4-mınýtynda «Avangardtyń» qorǵaýshysy Denıs Kýlıash esep ashyp, komandasyn alǵa shyǵardy. Arada taǵy 4 mınýt ýaqyt ótken kezde ombylyqtar ekinshi shaıbalaryn soǵyp, esepti eseledi. Qaqpanyń artynan aınalyp kelip Iаn Lasony qapy qaldyrǵan «Avangard» shabýylshysy Chad Kolarık bolatyn. Kezeń sońynda «Barys» eki márte oıynshy basymdyǵyna ıe bolǵanymen, qarsylastarynyń qaqpasynan sańylaý taba almady.
Ekinshi kezeńde «Barys» hokkeıshileri namysqa tyrysyp, oıyn tizginin óz qoldaryna aldy. Úzdiksiz shabýyldyń arqasynda Dastın Boıd esep aıyrmasyn qysqartty (28-mınýt). Degenmen, kelesi úziliske deıin tarazy basyn teńestire almady.
Al sheshýshi kezeńde qos tarap ta aıanyp qalmady. Aıdynnyń ár buryshynda shaıbaǵa talasqan hokkeıshiler naǵyz tartystyń úlgisin kórsetti. Teń jaǵdaıda órbigen bul kezeńde eki komanda da qos shaıbadan soqty. Kezeń bastalysymen Roman Starchenko esepti teńestirgen edi. Degenmen, 49 jáne 52-mınýttarda «Avangard» oıynshylary eki márte nátıjeli soqqy jasady. Tipti qonaqtardyń 10-mınýtta taǵy bir shaıba soǵýǵa múmkindikteri bolǵan. Tóreshi Ombydan kelgen komandanyń paıdasyna býllıt belgilegenimen, Aleksandr Popov qaqpashy Lasodan aılasyn asyra almady. Oıynnyń sońynda aıdyn ıeleri qarqyndaryn údetip, birneshe ótkir shabýyl uıymdastyrdy. Sonyń nátıjesinde, Naıdjel Doýs komandasynyń úshinshi shaıbasyn soǵyp, esep aıyrmasyn qysqartty. Alaıda, «Barys» bul oıynda jeńilisten qashyp qutyla almady. Sońǵy sekýndqa deıin tyrysqanymen «Avangard» oıynshylary tórtinshi shaıbany soqtyrmady. Búgingi oıynnan keıin qos komanda arasyndaǵy serııaly aıqastyń jalpyesebi 2:2-jetti. Endi qarsylastar 6 naýryzda Ombyda kúsh synasady.
Elaman Qońyr.
Derek: egemen.kz.
Sýret: hcbarys.kz.