ASTANA. 16 mamyr. Keshe AQSh prezıdentiniń rezıdensııasy – Aq úıdiń resmı saıtynda Barak Obamanyń 2014 jylǵy tabysy týraly esebi jarııalandy. 9 betten turatyn qujatta memleket basshysy men onyń otbasynyń qarjylyq jaǵdaıy 1,9 mln. dollardan 6,9 mln.-ǵa deıin baǵalanǵan. Bul týraly gazeta.ru habarlady.
Atalǵan málimet prezıdent pen onyń otbasynyń jeke baǵaýlary jáne esepteýlerine súıene otyryp jasalǵan. Soǵan sáıkes Barak Obama ózderiniń qarjylyq jaǵdaıyn jarııalady. Onyń dáýletiniń basym bóligi eldiń qarjy mınıstrligine tıesili borysh qaǵazdaryna jumsalǵan. Bul qaǵazdarǵa 1 mln-nan 5 mln. dollarǵa deıin salynǵan eken. Al 250 myńnan 500 myń dollarǵa deıingi qarjy ózge merzimderde óteletin boryshtyq qaǵazdarǵa bólingen.
Sonymen qatar, JP Morgan Chase bankindegi prezıdenttiń esepshotynda 50 myńnan 100 myńǵa, al Northern Trust bankinde 15 myń dollarǵa deıin aqshasy jatyr.
Odan bólek, Mıshel men Barak Obamanyń Vanguard zeınetaqy jınaqtaý qorynda 100 myńnan 250 myń kóleminde qarjysy bar.
Erli-zaıypty Obamalardyń ótken jyldaǵy kirisi 477 383 dollardy quraǵan. Bul aldyńǵy jylmen salystyrǵanda 3 715-ke kem. Federaldyq salyq retinde prezıdent pen birinshi hanym 93 myń dollar tólegen.
AQSh prezıdenti jyl saıyn 400 myń dollar kóleminde jalaqy alatynyn aıta keteıik.
Elaman Qońyr.
Derek: gazeta.ru.
Sýret: etoday.ru.