ASTANA. 17 mamyr. Keshe Astanada rejısser Doshan Joljaqsynov túsirgen «Qunanbaı» tolyqmetrajdy kórkem fılmniń tusaýkeseri bolyp ótti. Bul týraly Baq.kz habarlady.
Fılmniń sıýjeti Abaıdyń ákesi, ataqty dala kemeńgeri Qunanbaı О́skenbaıulynyń ónegeli ómiriniń bir kezeńinen syr shertedi.
Tarıhtan belgili, Qunanbaıǵa el bıleý isi, odan qaldy, aǵaıyn arasyndaǵy shıelinister men rýaralyq daý-damaılardy sheshý ońaıǵa túsken joq. Sondaı sátterde ol qashanda ádildikee júgingen. Qunanbaı óz halqynyń janashyr perzenti retinde qalyń buqara aldyndaǵy qaryzy men paryzyn tereń túsingen. Fılmde onyń kóregendigi, danyshpandyǵy, ádildigi, dástúrdi qurmetteıtini aıqyn kórsetiledi.
Rejısser kartınada Qunanbaıdyń tek jeke basy ǵana emes, sonymen qatar, XIXǵasyrdaǵy qazaq qoǵamynyń shynaıy kelbetin kórsetýge umtylypty.
«Bul tyń sheshimderge toly týyndyda qazaqtyń ótken eski ómirin de kórýge bolady. Lentada jalpy Qunanbaıdyń ózge de qyrlaryn ashqymyz keldi. Qunanbaı – asa kúrdeli tulǵa, bılik tizginin ustaǵan kezindegi qaıratkerligi qarama-qaıshylyqtarǵa toly. Ol bı, bolys, aǵa sultan bolyp bıliktiń úsh tutqasyn qatar ustap, sharıat jolyna týra kózqaraspen qaraǵan uly adam. Qunekeńniń osyndaı erekshe qyrlaryn bir fılmge syıdyrýǵa tyrystyq», - dedi rejısser.
Fılm Abaı aýdany, Qaraýyl aýylynda túsirilgen. Túsirilim jumystary 1 aı 18 kúnde atqarylǵan. Daıyndyqqa týra bes jyldaı ýaqyt jumsalǵan.
«Kınony Hadısha Bókeeva apamyzdan, keshe dúnıeden ozǵan Áshirbek Syǵaı aǵamyzdan dáris alǵan meniń úzeńgiles dostarymnyń basyn qosyp túsirdim. Túsirilim barysynda bes júzdeı kıiz úı tiktik. Tipti, qara daýyl soǵyp, 200-ge jýyq kıiz úıdi jel kóterip ketken kezder de boldy. Tamashalaǵan kórermen qaýymnyń qazaqtyń eski ómirine saıahattap qaıtqandaı áser alatynyna senimim mol», - dedi D.Joljaqsynov.
Kórkem fılmniń ssenarıin Doshan Joljaqsynovpen birge taıaýda ǵana ómirden ketken jazýshy Talasbek Ásemqulov jazǵan. Al mýzyka avtory - belgili kompozıtor Tólegen Muhamedjanov.
Fılmge elimizge tanymal akterlarmen birge Semeıdegi Abaı atyndaǵy jáne Dostoevskıı atyndaǵy teatrlardyń akterlary da tartylǵan.
Aıta keteıik, fılm jalpyulttyq prokatqa 25 mamyrdan bastap shyǵady.
Qaırat Qulymbet.
Derek, sýret: Baq.kz.