ATYRAÝ. 31 naýryz. Atyraýda daryndy oqýshylardyń qoǵamdyq-gýmanıtarlyq baǵyttaǵy respýblıkalyq olımpıadasynyń jeńimpazdary anyqtaldy. Bul týraly egemen.kz tilshisi habarlady.
Bilim básekesi eki týr boıynsha ótip, oǵan elimizdiń barlyq óńirinen, Nazarbaev zııatkerlik mektebinen, O.Jáýtikov atyndaǵy respýblıkalyq fızıka-matematıka mektebinen, sonymen birge, Abaı atyndaǵy respýblıkalyq mamandandyrylǵan mektep-ınternattarynan 556 oqýshy qatysty. Olar Qazaqstan tarıhy jáne quqyq negizderi, qazaq, orys tilderi men ádebıetteri, nemis, fransýz jáne aǵylshyn tilderinen saıysqa tústi.
Bilim jáne ǵylym mınıstrliginiń «Daryn» respýblıkalyq ǵylymı-praktıkalyq ortalyǵynyń dırektory Sholpan Qırabaevanyń málim etýinshe, bıylǵy olımpıada tapsyrmalary kúrdeli bolǵan. «Soǵan qaramastan oqýshylar mátin taldap, aýdarma jasady. Shyǵarmalar jazdy. Sóıtip, olar ózderiniń joǵary bilim deńgeıin kórsetti» dedi Sh.Qırabaeva. Sondaı-aq, ol eń úzdik dep tanylǵan shyǵarmalar toptamasy arnaıy kitapqa engiziletinin aıtty.
Olımpıada qorytyndysy boıynsha «Aýyl mektebiniń úzdik oqýshysy-2015» atalymy Batys Qazaqstan oblysyndaǵy Terekti lıngvıstıkalyq mektebiniń 11-synyp oqýshysy Á.Shýaqbaevqa berildi. Al onyń ustazy V.Toqtarova «Úzdik aýyl muǵalimi-2015» atandy. Sondaı-aq, Aqshuqyr mektep-lıseıi (Mańǵystaý oblysy) «Úzdik aýyl mektebi-2015» atalymymen marapattaldy. Qostanaı oblysyndaǵy qazaq-túrik lıseıiniń 8-synyp oqýshysy N.Iýrtaev «Eń jas qatysýshy» atandy. Osy saıysta №25 gımnazııasy (Almaty) men «BEST» (Soltústik Qazaqstan oblysy) gımnazııasyna «Úzdik olımpıada mektebi» atalymdary tabys etildi.
Sonymen birge, Ońtústik Qazaqstan jáne Soltústik Qazaqstan oblystarynyń komandalary úzdik úshtikti túıindedi. Al Batys Qazaqstan, Pavlodar jáne Qaraǵandy oblystarynyń bilimdi órenderi júldeli ekinshi orynnan kórindi. Atyraý, Qostanaı, Shyǵys Qazaqstan oblystary men Almaty jáne Astana qalalarynan baq synaǵan daryndy oqýshylar «Úzdik olımpıadalyq komanda» atalymdarynyń ıegerleri atandy.
Joldasbek Shópeǵul.
Derek, sýret: egemen.kz.