ALMATY. 31 naýryz. Azamattyq avıasııa komıteti tóraǵasynyń orynbasary Serik Muqtybaev ushaq kabınasynda eń kemi eki adam bolýy kerektigi týraly ereje talaptary elimizde 2011 jyldan beri qaraı oryndalyp kele jatqanyn málimdedi. Bul týraly QazTAG habarlady.
«Ereje talaptaryna saı áýe kemesinde ekıpajdyń jalǵyz múshesin jumys ornynda qaldyrýǵa bolmaıdy.Ushý barysynda eki ushqyshtyń biri jumys ornyn tastaıyn bolsa, ol jerde kabınalyq ekıpajdyń ózge múshesi bolýy tıis. Biraq ol kabınadan shyǵyp ketken ushqyshtyń jumys ornyna otyrmaıdy», dedi Muqtybaev.
Apatqa ushyraǵan Germanwings kompanııasynyń A320 laınerine baılanysty birqatar álemdik avıakompanııalar ekıpajǵa arnalǵan nusqaýlardy qaıta qarady. Máselen, Norvegııanyń Norwegian Air Shuttle ASA avıakompanııasynyń basshylyǵy ushaq ekıpajynyń múshelerine arnalǵan nusqaýdy tez arada ózgertti. Jańa erejege sáıkes, budan bylaı jolaýshy ushaǵynyń ushqyshy kabınada óz áriptesin jalǵyz tastamaıdy. Aldyńǵy erejede ondaı talaptar naqtylanbaı, ushqyshtardyń kabınadan kirip-shyǵýyna erekshe tyıym salynbaǵan bolatyn.
Budan bólek, EasyJet bastaǵan barlyq brıtanııalyq jáne kanadalyq Air Canada áýe kompanııalary da burynǵy ushý erejelerine ózgertýler engizdi. Onda «Budan bylaı ushqyshtar búkil ushý barysynda kabınada birge bolady» degen mindetti talap aıshyqty jazyldy.
Azamattyq avıasııa ushqyshtaryna qoıylatyn bul talapty nemis avıatorlary da qoldady.
Talǵat Súıinbaı.
Derek: QazTAG.
Sýret: egemen.kz.