Apatty aýyzdyqtaǵandarǵa alǵys

[caption id="attachment_73882" align="aligncenter" width="560"] BAL[/caption] Taıaýda Astanada Chernobyl atom elektr stansasynda bolǵan jarylystyń 30 jyldyǵyna oraı onyń zardaptaryn joıýǵa qatysqandardy marapattaý rásimi ótkizildi. Apat qurbandaryna arnalǵan eskertkish aldynda uıymdastyrylǵan shara Astana qalalyq «Chernobyl odaǵy» qoǵamdyq birlestiginiń bastamasymen júzege asty. Jıyn basynda qatysýshylar eskertkishke gúl shoqtaryn qoıyp, qurbandardy bir mınýt únsizdikpen eske aldy. Birlestiktiń tóraǵasy Qýandyq Omarbaevtyń aıtýynsha, bul – aldaǵy ýaqytta keń kólemde atalyp ótiletin mereıli data sheńberindegi alǵashqy is-shara. – Mundaı basqosýdyń maq­saty – apattyń zııanyn halyqqa jetkizip, onyń aldyn alý, jastardy otanshyldyqqa tárbıelep, rýhyn oıatý. Se­be­bi, jarylystyń zardabyn joıýǵa qatysqandardyń arasynda kózsiz erlikter jasaǵandar óte kóp. Búkil adamzatqa tón­gen qaýiptiń betin qaıtarǵan jan­dardyń sondaı áreketterin keıin­gi urpaqqa nasıhattaý bizdiń pary­zymyz, – deıdi Qýandyq Muhametjanuly. Jalpy, «Chernobyl odaǵy» respýblıkalyq zańdy tulǵalar qaýymdastyǵynyń muryndyq bolýymen apattyń 30 jyldyǵyna baılanysty sharalar elimizdiń barlyq aımaǵynda ótkiziledi. Bul jóninde qaýymdastyq tóraǵasynyń orynbasary Marat Júnis-Bek: – Qaýymdastyq BAQ ókil­deri arasynda arnaıy baıqaýlar ótkizip, nasıhat jumystarynyń sheńberin keńeıtýdi kózdep otyr. Son­daı-aq, arhıvtegi derektermen jumys istep, tyń dúnıelerdi jarııalaý da josparymyzda bar. Apat qurbandary men onyń zardaptaryn joıýǵa qatysqandar týraly keń mazmundy kitap shyǵaramyz. Qazirgi tańda respýblıkalyq qaýym­das­tyqqa múshe aımaqtardaǵy 11 qoǵamdyq birlestik atal­ǵan jumystarǵa daıyndyqty bas­tap ketti, – dedi. Shara sońynda bir top cherno­byldik arnaıy tós­belgilermen jáne ordendermen marapattaldy. Aıta keteıik, 1986 jyl­dyń 26 sáýirinde sol kezdegi KSRO aýmaǵyndaǵy Chernobyl AES-inde jarylys bolǵany belgili. Ol XX ǵasyrdaǵy eń iri tehnogendik apat retinde tirkeldi. Qaýiptiń aldyn alýǵa 30 myńnan astam qazaqstandyq qatysyp, kóp­shiligi radıasııa saldarynan ártúrli dertke shaldyqty. Búginde olardyń 6 myńǵa jýyǵy ǵana ortamyzda júr. Osy apatqa baılanys­ty BUU TMD elderi bas­shylarynyń 26 sáýirdi halyqaralyq radıasııalyq apat jáne zilzala qurbandaryn eske alý kúni dep jarııalaý týraly sheshimin maquldady. Elaman QOŃYR, «Egemen Qazaqstan». Sýretti túsirgen Orynbaı BALMURATOV.