Prokýratýranyń jańa ǵımaraty. Atyraý oblystyq prokýratýra qyzmetkerleri úshin boı kótergen jańa ǵımarattyń qurylysy aıaqtaldy. Bes qabatty jańa ǵımarattyń jalpy aýmaǵy – 3870 sharshy metr.
Munda úlken jáne kishi májilis zaldary, tergeý-krımınalıstik ádistemelik bólmeler, kompıýterlik testileý kýrstaryna arnalǵan bólme, murajaı jasaqtalǵan. Basty erekshelik, beınemájilis, sondaı-aq, selektorlyq baılanys júıesi ornatylǵan. Jańa ǵımarattyń ashylý saltanatyna Bas Prokýror Qaırat Mámı qatysty. – Oblystyq prokýratýra qyzmetkerleriniń jańa ǵımaratta alańsyz jumys jasaýyna barlyq jaǵdaı jasalǵan. Endi el zańdylyqtarynyń qatań qadaǵalanýyna tolyq negiz bar, – degen Bas Prokýror oblystyq prokýratýra ujymyna 40 kompıýterdi syıǵa tartty. Sonymen birge, jańa ǵımarat qurylysynyń merziminde aıaqtalýyna qoldaý bildirgeni úshin oblys ákimi B.Rysqalıevke Bas prokýratýranyń qurmet gramotasyn tapsyrdy.
Joldasbek ShО́PEǴUL, Atyraý oblysy.
Oralhan oqýlary ekinshi márte ótti. Katonqaraǵaı aýylynda kórkemsózdiń kerbuǵysy, jazýshy Oralhan Bókeı atyndaǵy kórkemsóz oqý sheberleriniń baıqaýy qatarynan ekinshi jyl kindik qany tamǵan ólkesinde bolyp ótti. Oǵan bıyl qalalar men aýdandardan irikteý saıysynda top jarǵan 15 úmitker keldi. Olar proza, drama, poezııalyq shyǵarmalardan úzindiler oqyp, ózderiniń sheberlikterin qazylar alqasynyń tezine saldy. Oblystyq tilderdi damytý basqarmasynyń bastyǵy Manarbek Muhametjanov osy qyzmettiń tizginin ustaǵaly Kendi Altaıda kóp ister atqarylyp jatyr. El men jer ózderiniń tarıhı ataýlaryna ıe bolýda. Memlekettik qyzmettegiler arasyndaǵy til saıystary da qyzyqty ári tartysty ótýde. Bas júldege Kýrchatov qalasynan kelgen orys qyzy Inga Pýtınseva ıe boldy. Júldegerlerge baǵaly syılyqtar tabys etildi.
Ońdasyn ELÝBAI, Shyǵys Qazaqstan oblysy, Katonqaraǵaı aýdany.
О́nerkásip kórmesi órisin keńeıtti. Aqtóbe qalasyndaǵy “Alataý” kesheninde ótip jatqan “Eýropa-Azııa. Shekarasyz yntymaqtastyq” atty IH Qazaqstan-Reseı ónerkásip kórmesine elimizdiń barlyq aımaqtarynan jáne Reseıdiń birqatar oblystarynan 150-ge jýyq kásiporyn, shaǵyn jáne orta bıznes sýbektileri qatysýda. Jyl saıyn kórmeniń aıasy keńeıip, oǵan qatysýshylar qatary artyp keledi. Bıyl toǵyzynshy ret ótkizilip otyrǵan kórmeni uıymdastyrýshylar – Aqtóbe oblysynyń ákimdigi, Orynbor oblysynyń úkimeti, Orynbor qalasynyń ákimshiligi, kórshiles eki oblystyń saýda-ónerkásip palatalary, Aqtóbe oblystyq kásipkerler men jumys berýshiler odaǵy, “ÝralEkspo” qoǵamy. Kórmege birinshi ret Belorýssııanyń “QýzLıtMash” kompanııasy óz ónimderin ákelipti. О́nerkásip kórmesine qatysýshylar ózara tıimdi kelisim-sharttar jasasty.Ony oblys ákimi Eleýsin Saǵyndyqov pen Orynbor oblysynyń gýbernatory Iýrıı Berg bastaǵan delegasııalar aralap kórdi.
Satybaldy SÁÝIRBAI, Aqtóbe oblysy.
Demırel atyndaǵy jańa ýnıversıtet. Jetisý jerinde joǵary oqý oryndarynyń qatary jańasymen tolyqpaq. Irgeli oqý orny Qaskeleń qalasynyń kireberisine oryn tebetin bolady. Oǵan tapsyrys berýshi de, nysandy salyp jatqan da túrik aǵaıyndar. Bolashaqta Súleımen Demırel atyndaǵy ýnıversıtet qalashyǵyna aınalatyn oqý ornyndaǵy segiz fakýltette 7000 stýdent dáris almaqshy. Qazirgi kezde ýnıversıtet qurylysynyń birshama jumysy ıgerilgen. 2500 stýdentke jataqhana berilse, 120 oqytýshy 5 qabatty turǵyn úıdegi páterlermen qamtamasyz etiledi. Demek, jańa ýnıversıtet keler jyly shákirtterge esigin aıqara ashatyn bolady.
Kúmisjan BAIJAN, Almaty oblysy.
Mal soıý sehy iske qosyldy. Zelenov aýdany Trekın aýylynda jańa mal soıý sehy salynyp, iske qosyldy. Onyń bazasynda aýyl sharýashylyǵy taýarlaryn óndirýshiler men mamandar bas qosyp, semınar-keńes uıymdastyrdy. Onda oblystyq aýyl sharýashylyǵy basqarmasynyń bastyǵy Marat Ońǵarbekovtiń atap ótkenindeı, azyq-túlik qaýipsizdigin qamtamasyz etý maqsatynda mundaı nysandardy oblystyń ózge de aýyldarynda tezdetip ashýdyń mańyzy zor. Laboratorııalyq-sanıtarlyq saraptama júrgizýge lısenzııa alǵan, qazirgi zamanǵy maldárigerlik qadaǵalaý talaptaryna tolyq saı keletin atalmysh seh aýysymyna 30-50 bas mal soıa alady. Ony iske qosqan “Járdem” sharýa qojalyǵynyń basshysy Serikqalı Ájıevtiń aıtýynsha, nysan quny 18 mıllıon teńgeni quraǵan.
Temir QUSAIYN, Batys Qazaqstan oblysy.
Jol apatynan saqtandyrady. Soltústik Qazaqstan oblystyq jol polısııasy jol qozǵalysynyń qaýipsizdigi maqsatynda arnaıy aksııalardy júıeli ótkizip keledi. Solardyń biri oblys ortalyǵyn qamtydy. Shara barysynda apatqa ushyraǵan kólikter evakýatorlarǵa tıelip, kolonna quraǵan kúıi ortalyq kóshelermen júrip ótti. Júrgizýshiler men jaıaý júrginshilerge únparaqtar taratylyp, abaı bolýdyń jaı-japsary túsindirildi. Bıylǵy 6 aıda 112 jol apaty bolyp, 23 adam kóz jumǵan. 130 adam dene jaraqattaryn alǵan. Olardyń 12-si – balalar. MAI qyzmetkerleriniń aıtýlarynsha, jol júrý erejesiniń buzylýyna aldymen jaıaý júrginshiler kináli. Júrgizýshiler arasynda jyldamdyqty asyrý, qarsy betke shyǵyp ketý faktileri jıi kezdesedi.
О́mir ESQALI, Soltústik Qazaqstan oblysy.