ASTANA. 1 shilde. Syrtqy ister mınıstri Erlan Ydyrysov Kýba syrtqy ister mınıstriniń orynbasary Rohelıo Sıerra Dıaspen kelissózder júrgizdi. Kezdesý barysynda taraptar ekijaqty yntymaqtastyqtyń qazirgi jaǵdaıy men ony odan ári damytý bolashaǵyn, sondaı-aq, bıylǵy jyldyń kúzine josparlanǵan Qazaqstan Prezıdenti Nursultan Nazarbaevtyń Kýba Respýblıkasyna resmı saparyna daıyndyq máselelerin talqylady. Bul týraly Syrtqy ister mınıstrliginiń baspasóz qyzmetine silteme jasaǵan «QazAqparat» habarlady.
Erlan Ydyrysov Qazaqstan men Kýbanyń halyqaralyq uıymdardyń aıasynda bir-biriniń bastamalaryna dástúrli túrde ózara qoldaý tanytyp otyrǵanyn atap ótti.
«Birlesken tyǵyz ózara yqpaldastyqtyń nátıjesinde Kýba Qazaqstan kandıdatýrasynyń 2017-2018 jyldary BUU Qaýipsizdik Keńesine turaqty músheligi, al Qazaqstan – Kýbanyń 2017-2019 jyldary BUU-nyń Adam quqyqtary jónindegi keńesine qaıta saılaný ótinimine qoldaý bildiredi», – dedi mınıstr.
Sondaı-aq, taraptar bilim, densaýlyq saqtaý jáne parlamentaralyq dıalog salasyndaǵy yntymaqtastyqty damytý týraly pikirler almasyp, olardy qazaqstandyq-kýbalyq ózara árekettestiktiń eń áleýetti baǵyttary ekenin aıtty.
Kezdesý sońynda Qazaqstannyń syrtqy saıası vedomstvosynyń basshysy kýbalyq tarapqa EKSPO-2017 kórmesin ótkizý quqyǵyn alý úshin Astana kandıdatýrasyna daýys bergeni jáne onyń jumysyna belsendi qatysý sheshimi úshin alǵysyn bildirip ótti.
Sóz sońynda mınıstr: «Bizdiń oıymyzsha, bul kórmeniń tabysty ótýine eleýli úlesin qosyp, jańǵyrtylatyn energııa kózderi jáne jasyl tehnologııalardy damytý salasynda qazaqstandyq-kýbalyq baılanystardyń keńeıýine septigin tıgizedi», – dedi.
Elaman Qońyr.
Derek, sýret: «QazAqparat».