ASTANA. 25 tamyz. Qytaı astanasy – Beıjiń qalasynda ótkizilip jatqan jeńil atletıkadan álem chempıonatynda otandasymyz, London Olımpıadasynyń chempıony Olga Rypakova úsh qarǵyp sekirý saıysy boıynsha qola júldeger atandy. Ol sońǵy múmkindiginde 14,77 metrge sekirip, basty básekelesi bolgar Gabrıela Petrovadan 11 santımetrge artyq nátıje tirkedi. Bul týraly egemen.kz habarlady.
Saıystyń jeńimpazy retinde kolýmbııalyq Katrın Ibargýen atandy. Onyń kórsetkishi 14,90 metr. Al kúmis júlde Izraılden kelgen Anna Knıazova-Mınenkoǵa buıyrdy (14,78 metr).
Rypakova álem chempıonatyndaǵy bul júlde Rıo-de-Janeıro Olımpıadasy qarsańynda ózine degen senimdilikti kúsheıtip, jigerin arttyratynyn aıtty.
«Bıylǵy maýsymǵa daıyndyq kóńildegideı bolmady. Oǵan jaraqattarym sebep boldy. Sondyqtan Beıjińde 14,77 metrdi baǵyndyramyn dep múldem oılaǵan joqpyn. Bul kórsetkish kelesi jylǵy Olımpıadada joǵary nátıjege qol jetkizý úshin kúsh beretinin aıtqym keledi», – dedi Olga Reseıdiń aqparat quraldaryna bergen suhbatynda.
Aıta keteıik, Beıjińdegi álem chempıonaty 30 tamyzda aıaqtalady.
Elaman Qońyr.
Derek: egemen.kz.
Sýret: yvision.kz.