Atyraý oblysynyń jurtshylyǵy «Qazaqstan halqy Assambleıasy-20 ıgi is» respýblıkalyq estafetasynyń sımvolyna aınalǵan Taıqazandy qoshemetpen qarsy aldy.
Oblys ákiminiń orynbasary Shyńǵys Muqannyń aıtýynsha, atalǵan estafeta bastaý alǵaly beri Atyraýda birneshe jańa ıgi ister qolǵa alyndy. Naqtylaı aıtqanda, 60-qa jýyq qaıyrymdylyq sharasy ótip, odan 7 mıllıon teńgege jýyq qarajat jınaldy. Sóıtip, óńirdegi Uly Otan soǵysynyń ardagerleri men maıdanda qaza tapqandardyń otbasylaryna, az qamtylǵan jáne kópbalaly otbasylarǵa áleýmettik kómekter berildi.
Atalǵan shara Qurmanǵazy atyndaǵy mádenıet úıinde «Sheksiz talant» qaıyrymdylyq konsertimen jalǵasyn tapty. Oǵan óńirdegi 17 etnomádenı birlestiktiń ónerli músheleri, sondaı-aq, múmkindigi shekteýli bolsa da ónerdi janyna serik etken jandar belsene atsalysty. Ásirese, arbaǵa tańylǵan jandardyń bıi jurtshylyqtyń erekshe yqylasyna ıe boldy. Sonymen birge, Bereket Aqjigitov, Baqyt Sálıev syndy múmkindigi shekteýli jandardyń qolynan shyqqan týyndylarǵa qyzyǵýshylyq tanytyldy. Bulardyń barlyǵyna munaıshylar atynan syı-sııapat kórsetildi.
– Taıqazan Qazaqstandaǵy tatýlyq pen birliktiń, yntymaq pen berekeli tirliktiń nasıhatshysyna aınaldy, – degen oblys ákiminiń orynbasary Shyńǵys Muqan ony kórshiles Batys Qazaqstan oblysynyń ókilderine tabystady.
Joldasbek ShО́PEǴUL,
«Egemen Qazaqstan».
Atyraý oblysy.
Sýretti túsirgen
Rahym QOILYBAEV.