Kıeli Túrkistannan bastaý alǵan Taıqazannyń kóshirmesi Jambyl jerine kóktem shýaǵyn, jylylyq, izgilik alyp keldi. Toqshylyq pen bereke-birlik belgisine aınalǵan «Qazaqstan halqy Assambleıasy – 20 izgi is» estafetasynyń basty sımvolyn jambyldyqtar 1 naýryz kúni Qordaı aýdanynda úlken yqylaspen qarsy aldy. Sóıtip, osy apta ishinde Jambyl oblysynyń barlyq aýdandaryn aralaǵan Taıqazan ishi qaıyrymdy istermen tolyǵa tústi.
«Qazfosfat», «Hantaý» JShS-leri, «Myńaral» sement zaýyttary bastaǵan óńirdegi irili-usaqty kásiporyndar, sharýashylyqtar, jeke kásipkerler kópbalaly, áleýmettik az qamtamasyz etilgen otbasylarǵa, soǵys jáne eńbek ardagerlerine, múgedek jandarǵa baǵaly syılyqtar tapsyryp, kómek qoldaryn sozdy. Naqtyraq aıtsaq, Shý aýdany 200 adamdyq ońaltý ortalyǵyna 5 mln. teńgege avtobýs satyp alyp berse, Moıynqum jáne Baızaq aýdandary az qamtamasyz etilgen otbasylarǵa 2 mln. teńge, Jýaly aýdany aýǵan soǵysy ardagerlerine 2,5 mln. teńge, Sarysý aýdany kópbalaly otbasylardaǵy stýdentterdiń oqý qarjysyn tóleýge 2,4 mln. teńge, soǵys ardagerleriniń úılerin jóndeýge 590 myń teńge, sondaı-aq, 1 mln. teńgege 2 jazýshynyń kitabyn shyǵarýǵa, Jambyl aýdany 40 soǵys ardagerine 480 myń teńge kóleminde kómek kórsetti.
Budan bólek, etnomádenı birlestikter alys aýyldarda turatyn 125 adamǵa 400 myń teńgeniń dári-dármekterin alyp berdi. Estafeta aıasynda jasalǵan qaıyrymdylyq isterdiń sońy qaı aýdanda bolmasyn, túrli ult ókilderiniń, eńbek ujymdarynyń, mektep oqýshylarynyń qatysýymen ulan-asyr merekelik is-sharalarǵa ulasyp jatty. Ásirese, túrli ult ókilderiniń belsendiligi aıqyn ańǵaryldy.
Sóıtip, keshe Taıqazan san ǵasyrdan syr shertken kóne Taraz qalasyna kelip jetti. Aýyr atletıkadan álem chempıony Jasulan Qydyrbaev, talaı bilim saıysynyń júldegerleri atanǵan Aıdyn Qoıbek pen Álisher Tájihanov saltanatty túrde tórge alyp shyqqan Taıqazan taǵy da kóptegen qaıyrymdy isterge muryndyq bolyp, eldiń tula boıyn meıirimge toltyrdy. Taraz qalasynyń ákimi Nurjan Kalenderov bastaǵan kásipkerler, basqa da jomart azamattar bul kúni kóptegen jandarǵa qaıyrymdylyq qolyn sozdy.
«Birlik pen beıbitshilik bar jerde meıirimdilik ornap, qaıyrymdylyq ister qashanda jalǵasa bereri sózsiz. Áýlıeata jerin mekendegen san túrli ult ókilderiniń Qazaqstan jerine, Elbasyna degen alǵystary men rızashylyqtary óte mol», – deıdi Jambyl oblysy ákiminiń orynbasary Erqanat Manjýov.
Kóne Taraz qalasy turǵyndarynyń jomarttyǵy men keńpeıildiginiń kýási bolǵan Taıqazan osy kúni Jetisý jerine jol tartty. Qazaqstan halqy Assambleıasy Almaty oblystyq hatshylyǵynyń meńgerýshisi Tursynbaı Ǵabıt tarazdyqtarǵa Jetisý eliniń ystyq sálemin joldap, osy ıgilikti iske óz úlesterin molynan qosatyndyqtaryn jetkizdi.
Oralhan DÁÝIT,
«Egemen Qazaqstan».
Jambyl oblysy.
Sýretti túsirgen
Aqádil RYSMAHAN