Jıyndy ashqan Qazaqstan azamattyq Alıansynyń prezıdenti Nurlan Erimbetov qoǵam qaıratkerlerin el úshin mańyzy zor saıası úderisten tys qalmaýǵa shaqyra kelip, bul oraıda, kezekten tys prezıdenttik saılaýdy baıqaý jónindegi respýblıkalyq Qoǵamdyq komıssııanyń jumysyn qaıta jandandyrý týraly sheshim qabyldanǵanyn jetkizdi. «Bul qurylym buǵan deıingi saılaý naýqandarynyń kezinde de óz jumysynyń tıimdiligin kórsetken bolatyn. Biz únemi saılaý naýqandaryna baılanysty ózimizdiń obektıvti baǵamyzdy berip kelemiz. Aldaǵy ýaqytta úmitkerlerdiń saılaýaldy shtabtarynyń, saılaý komıssııalarynyń jáne BAQ-tardyń tarapynan júrgiziletin úgit-nasıhat sharalary barysynda elimizdiń saılaý zańnamalarynyń saqtalýyna qoǵamdyq baqylaý jasaıtyn bolamyz. Qoǵamdyq baqylaý aıasyn keńeıtý, zańdy jáne transparentti saılaý ótkizý barysynda respýblıkalyq komıssııa birneshe baǵytta jumys júrgizetin bolady», – dedi N.Erimbetov.
Onyń aıtýynsha, elimizdiń barlyq óńirinde qoǵamdyq komıssııanyń bólimshelerin qurý júzege asyrylyp, elektoraldy úderiske qatysatyn kandıdattar úshin barlyq múmkindik qamtamasyz etilmek. «Saılaý úderisterin buzýǵa baǵyttalǵan áreketterdiń betin qaıtaryp, olarǵa ýaqtyly toıtarys berý men ákimshilik resýrstyń jáne teris pıǵyldy pıardyń aldyn alý da bizdiń mindetimiz. Bılikpen, BAQ-tarmen, saıası partııalarmen jáne halyqaralyq mıssııalarmen tyǵyz qarym-qatynas jasaý úshin ashyq qoǵamdyq únqatysý alańyn quratyn bolamyz. Iаǵnı, biz sizdermen árqashan da baılanystamyz», – dedi ol óziniń sózinde.
«Astana Báıterek» áıelder klýbynyń tóraıymy Tamara Lavrınenko Qazaqstan azamattary eldegi barlyq saıası úderister men memleket damýynyń kýágeri bolyp otyrǵanyn aıtty. «Táýelsizdik alǵannan keıin elimiz kóp ózgeristi basynan keshti. Halqymyzdyń kúsh-jigeri men qajyr-qaıratynyń nátıjesinde kóp jetistikke jettik. Sol sebepti, elimizde kezekten tys prezıdenttik saılaý ótkizýge barlyq jaǵdaı jasalǵan. Aldaǵy ýaqytta, Respýblıkalyq qoǵamdyq komıssııa osy saılaý naýqanyn baıqaýdy óziniń moınyna alyp qana qoımaı, onyń qorytyndysyn baıandaıtyn bolady», – dedi T.Lavrınenko.
Belgili qoǵam qaıratkeri Ádil Ahmetov: «Qazaqstan basqa elderdegi saılaýlarǵa da qatysyp, bul salada baı tájirıbe jınaqtap úlgerdi. Iаǵnı, elimizdiń sheteldik tájirıbesi jetkilikti. Qoǵamdyq komıssııanyń negizgi maqsaty – saılaýdyń ádil, ashyq ótýin qamtamasyz etý. Bul komıssııa úgit-nasıhat jumystaryn júrgizbeıdi, kerisinshe, saılaý naýqanynyń basynan bastap ádil ótýine yqpal jasaıdy. Eger de, kemshilikter oryn alyp jatsa, solardyń der kezinde aldyn alýǵa atsalysatyn bolady», dedi.
Qazaqstan halqy Assambleıasy janyndaǵy Zańgerler qaýymdastyǵynyń dırektory Patıma Matjanova Qazaqstanda táýelsizdik alǵan jyldardan beri birneshe saılaý naýqany ótkenine, bul, tıisinshe, osy saladaǵy tájirıbeniń jınaqtalýyna yqpal etkenine toqtalyp ótti. «Biz óz elimizdegi saılaý naýqandaryn ǵana emes, ózge elderdegi saılaýlardy da baıqaý kezinde kóp tájirıbe jınaqtadyq. Sondyqtan, respýblıkalyq Qoǵamdyq komıssııanyń quramynda bilikti azamattar shoǵyrlanǵan», – dedi ol bul oraıda.
Aqyn Nesipbek Aıtov óz oıyn bylaısha jetkizdi: «Biz elimiz úshin mańyzdy da sheshýshi sátten tysqary qalmaýymyz kerek. Sondyqtan, kezekten tys prezıdenttik saılaýdyń barysyn baıqaıtyn respýblıkalyq Qoǵamdyq komıssııanyń jumysyna qatysýǵa bel baılap otyrmyz. Biz osy saılaýdyń bastan-aıaq ashyq ótýin baıqap qana qoımaı, oǵan baǵa berýge mindettimiz. Úmitkerlerdiń saılaýaldy shtabtarynyń, saılaý komıssııalarynyń jáne BAQ-tardyń tarapynan júrgiziletin úgit-nasıhat jumystarynyń zań talaptaryna saı ótýin de aıryqsha baıqaıtyn bolady. Saılaýdyń ádil ótýine árbir Qazaqstan azamaty múddeli bolýy tıis», – dedi ol.
Qazaqstan halqy Assambleıasy janyndaǵy Jýrnalıst-sarapshylar klýbynyń tóraǵasy Ǵadilbek Shalahmetov saılaýǵa halyqtyń meılinshe kóp bóliginiń kelýi el úshin óte mańyzdy ekenin jetkize kele: «Biz qazirgi tańda kúrdeli saıası kezeńdi bastan ótkerip otyrmyz. Oǵan kórshi memleketterde oryn alyp otyrǵan saıası jaǵdaılar da dálel bola alady. Qazir – óte jaýapty kezeń. Sondyqtan, bul saılaýǵa barlyq azamattar atsalysady ǵoı dep oılaımyn. Al respýblıkalyq Qoǵamdyq komıssııa óńirlerde bolyp, saılaý naýqanynyń júrý barysyn jiti qadaǵalaıtyn bolady», – dep óz oıyn túıindedi.
Al Bas redaktorlar klýbynyń prezıdenti, «Jetinshi arna» dırektorlar keńesiniń tóraıymy Bıbigúl Jeksenbaı Qazaqstan Prezıdentin kezekten tys saılaý el úshin úlken syn saǵaty bolyp turǵanyn tilge tıek etti. Bul rette ol: «Bir jaǵynan, bul – halqymyz úshin, memleketimiz úshin, jalpy, qoǵamdyq-ákimshilik ınstıtýttary men BAQ úshin jaýapty kezeń. Sondyqtan, buqaralyq aqparat quraldaryndaǵy áriptesterim de osy jaýapty kezeńnen abyroımen ótýi tıis. Árıne, ártúrli jaǵdaılar bolady. Keı kezde jeńil tabys qýyp, qara pıarǵa baratyn nemese reıtıng qýyp, teris aqparat beretin jaǵdaılar kezdesedi. Mine, osy turǵyda men óz áriptesterimdi ózderine júktelgen jaýapkershilikti sezinýge, saılaýdyń ashyq ári ádil ótýine barynsha jaǵdaı jasaýǵa shaqyramyn. Aldaǵy ýaqytta respýblıkalyq Qoǵamdyq komıssııa saılaýdyń ótýine baılanysty monıtorıng jasap otyrady», – dedi.
Láıla EDILQYZY,
«Egemen Qazaqstan».
Sýretti túsirgen
Azat ESEMBEKOV.