ASTANA. 25 tamyz. Búgin Astananyń «Barys» hokkeı komandasy Qurlyqtyq hokkeı lıgasynyń bıylǵy maýsymyndaǵy alǵashqy oıynyn ótkizedi. Maýsymdy óz aıdynynda bastaıtyn «Barys» Magnıtogorskiniń «Metallýrg» klýbyn qabyldaıdy. Bul týraly egemen.kz habarlady.
Kezdesý elordadaǵy «Qazaqstan» sport kesheninde ótedi. Jergilikti ýaqytpen saǵat 19:30-da bastalatyn oıyndy KazSport telearnasy tikeleı efırde kórsetýdi kózdep otyr.
Araǵa eki kún salyp Erlan Saǵymbaev jattyqtyratyn komanda Ýfanyń «Salavat Iýlaev» komandasymen kúsh synasady. Ol kezdesýdi de astanalyqtar óz aıdynynda ótkizedi.
Osy rette aıta keter jaıt, bıyl Astanada kóp fýnksıonaldy jańa muz saraıynyń paıdalanýǵa berilgeni belgili. 12 myń oryndyq sport kesheninde «Barys» Qurlyqtyq hokkeı lıgasy sheńberinde óz aıdynyndaǵy kezdesýlerin ótkizedi. Alaıda, 11 qyrkúıekte Qazaq handyǵynyń 550 jyldyǵyna baılanysty atalǵan jańa ǵımaratta teatrlandyrylǵan qoıylym uıymdastyrylady. Soǵan daıyndyq jumystarynyń júrgizilýine baılanysty «Barys» maýsymdy burynǵy aıdynynda bastaıtyn boldy. Atap aıtqanda, «Metallýrg» pen «Salavat Iýlaevtan» bólek, «Lokomotıv» (6 qyrkúıek), «Lada» (8 qyrkúıek), «Ak Bars» (10 qyrkúıek) jáne «Sochı» (10 qyrkúıek) komandalaryn «Qazaqstan» sport kesheninde qabyldaıdy. Al odan keıingi matchtar jańa aıdynda ótedi.
«Barys» úshin bul osy lıgadaǵy 8-maýsym. Alǵash ret týrnırge 2008-2009 jylǵy maýsymda qatysqan komandanyń eń joǵary nátıjesi 2013-2014 jylǵy maýsymda tirkeldi. Sol kezde «Barys» Qurlyqtyq hokkeı lıgasy pleı-off básekesiniń ekinshi raýndyna deıin jetken bolatyn. Al qalǵan maýsymdardyń barlyǵynda pleı-off satysynyń birinshi aınalymynan asa almaı keledi.
Elaman Qońyr.
Derek: egemen.kz.
Sýret: vk.com.