Elbasy Nursultan Nazarbaev elimizde kezekten tys prezıdenttik saılaý ótkizý jóninde Qazaqstan halqyna óz Úndeýin jarııalaǵany belgili. Úndeý jarııalaýǵa sebep bolǵan myńdaǵan azamattyń usynystary, saıası partııalar men demokratııalyq kúshter, respýblıkalyq qoǵamdyq birlestikter men 500-den astam úkimettik emes uıymdardyń ókilderinen kelgen usynys-tilekter edi.
Elbasy óz atyna kelip túsken usynys-tilekterge oraı sheshim qabyldaý qajettigi týyndaǵanyna toqtaldy. Kezekten tys prezıdenttik saılaý ótkizý eldiń búgingi ishki saıası turaqtylyǵy men ekonomıkalyq qýatyn odan ári nyǵaıtý múddesinen týyndap otyrǵanyn atap ótti. Halyqqa Úndeýinde Elbasymyz aldaǵy sáýir aıynda prezıdenttik saılaý ótkizýdiń konstıtýsııalyq normalarǵa sáıkestigi jóninde Senattyń suranysy boıynsha Konstıtýsııalyq Keńestiń sheshimi bolǵanyn, osy sheshimge negizdep Konstıtýsııanyń 41-baby boıynsha sáýir aıynyń 26-synda prezıdenttik saılaý ótetinin jarııalady.
Qazaqstan álemdegi barynsha damyǵan 30 eldiń qataryna qosylýǵa baǵyt alyp, «Nurly Joldy», nurly bolashaqty tańdady. Ata-babalarymyz san ǵasyrlar ańsaǵan «Máńgilik El» bolý muratyn jalpyulttyq ıdeıa retinde basty baǵdar etip aldy. Osyndaı jetistikke jetýimizdiń negizinde Qazaq elin táýelsizdiktiń máńgi tuǵyryna shyǵarǵan, ekonomıkalyq qıynshylyqtar men saıası shıelenisterden alyp shyqqan Elbasymyzdyń eren eńbegi jatyr. Sondyqtan bul tarıhı mańyzy erekshe saılaýǵa Elbasymyzdyń qatysýy týraly sheshimin Qazaqstan halqy úlken úmitpen, zor senimmen kútýde.
Qorqyt ata atyndaǵy Qyzylorda memlekettik ýnıversıtetiniń oqytýshy-professorlar quramy men stýdent jastary da prezıdenttik saılaýǵa belsendi qatysýdy azamattyq boryshy jáne perzenttik paryzy dep biledi.
Qylyshbaı BISENOV,
Qorqyt ata atyndaǵy QMÝ rektory, professor.
QYZYLORDA.